Налшык и «Горзеленхоз» IуэхущIапIэм и лэжьакIуэхэм иджы хуэдэ зэманым къалэм и удз гъэгъа гъэкIыпIэхэр япщIэ. Мыгувэу ахэр бжьыхьэ лэжьыгъэхэм пэрыхьэнущ. Ар къэ­мыс щIыкIэ удз гъэкIы­пIэхэр зэщIагъэкъабзэмэ, етIанэгъэ хасэжыну удз жылэхэр нэхъ тыншу къыпыха мэхъу, щIыри бжьыхьэсэм хуагъэхьэзыр.

Гъэмахуэм и кIэм ирихьэлIэу гъуэла гъэгъа лIэужьыгъуэхэр щIыпIэ куэдым къыщра­чыжащ. Апхуэдэщ къэрабэ ­гъуэжьхэр, розэ пасэхэр, н. къ. Иужьрейхэр илъэс зыбжанэ ипэкIэщ къыщытхуахьар. Ахэр уардэщ, дахэщ, ауэ игъащIэ ­лъандэрэ Урысейм и щIыналъэхэм къадекIуэкIа розэхэм ­ялъэщIыхьэнукъым я бэшэ­чагъкIэ. Розэ лIэужьыгъуэщIэ­хэм уащрохьэлIэ къалэм и къулы­къущIапIэхэм, тыкуэнхэм я бжэ­Iупэхэм. ШыщхьэуIум ику­хэм щегъэжьауэ абыхэм я нэхъыбэм я пщIащэхэр мэгъуалэ, я гъэгъа­хэми, япэрей дахагъэр ябгъэ­дэмылъыжу, фае мэхъу.  Псом нэхърэ нэхъ узыхуэмейращи, бадзапцIэ цIыкIунитIэ, иджыпсту дэни щахуэмыгъэкIуэдым, я тIысыпIэ мэхъу, ди щIыналъэм и удзхэм зэращымыщыр нэры­лъагъуу.

Ди щIыналъэм и розэхэр хэIэтыкIатэкъым, плъыфэ куэди хъуртэкъым (тхьэмбылыфэ, хужь, плъыжь-фIыцIафэ), иджы дызрихьэлIэ лIэужьы­гъуэщIэхэм хуэдэу нэр щызы­сыкI гъуэжьычи гъуэплъи яхэтакъым. ИтIанэ, ахэр гъагъэрт, япэ уэсыр къытрилъхьэу, уеблэмэ щIы щхьэфэр тещтыкIыху.

- Гуапэкъым апхуэдэ гъэгъа жылэхэр мыдрейхэм хагъэзэ­рыхьыж зэрыхъуар, - жаIэ куэд щIауэ гъэгъахэм яхэт ныбжь зиIэ лэжьакIуэхэми.

Пасэрей розэхэр нобэ дахащэу щагъэкI ХьэтIохъущокъуэм и жыг хадэм, ЩоджэнцIыкIум и цIэр зезыхьэ уэрамымкIэ щыIэ ихьэпIэм хуэзэу кIуэцIрыкIыу итщ ахэр, япэрей къалэ паркыр уи нэгу зэуэ къыщIагъэхьэу.

Къалэкум узыщрихьэлIэ язы­ныкъуэ удз гъэгъа гъэкIыпIэхэм гъэгъагъэшхуэ (георгинэ) зэмы­фэгъухэр итщ. Ахэр япщIащ, зэкъуачащ, хэгъукIахэр къыпачащ, ар зыпщIэхэм зэрыжаIамкIэ, уэс къесыху абыхэм еIусэнукъым, сыт хуэдэ дуней щы­тыкIэми хъарзынэу зэрезэгъым къыхэкIыу. Ахэр зэ еплъыгъуэкIэ «веселая семейка» гъэгъахэм ибогъэщхь, арщхьэкIэ  лъахъшэрыкI ящIа гъэгъагъэшхуэу аращ - Iуву къекIуэкI къапщIийхэмкIэ къыбощIэ. Мыдахэу пхужыIэнкъым ахэри, пасэ зэманым щыIахэм йомыгъапщэмэ:  лъэдийупцI хъужауэ  абыхэмкIэ ягъэдахэу щытащ ­къуажэдэсхэм я пщIантIэхэр, хадэ цIыкIухэр.

Гъэгъагъэшхуэ лъахъшэрыкI­хэм иджы яхэтщ удз дэжейм и теплъэр зыгъуэтахэр. Абыхэм, дадза нэужь, ягъуэта лъэдий лантIэ къарууншэхэр зэуэ щIо­щIэ, щIым хохуэжри, зи щхьэр къыхэзыIэтыкIыжыфхэр къэгъагъэу аращ, дунейр щыуэлбанэрилэм, щхьэ къищIахэм ящыщ куэд щIым хофыхь. Илъэс ипэкIэ ахэр итащ къалэ паркым и клумбэхэм ящыщ зым, ауэ иужькIэ хасэжакъым, пщIэгъуей зэрыхъум къыхэкIыу. ЖыпIэнурамэ, ахэр паркхэм ­къезэгъ гъэгъауэ щыткъым, ­къахуигъэщIа теплъэр яIэу унагъуэ пщIантIэхэр ягъэдэхэн ­хуейуэ арагъэнт. ТIум щыгъуэми, гъэгъа мыдахэ щыIэкъым, я дэтхэнэми нэр ягъэгуфIэ, ди паркхэр, лъэс зекIуапIэхэр ягъэ­щIэращIэ.

Фэтэр куэду зэхэт унэхэм я бжэIупэхэми ущрохьэлIэ нэхъапэм дымылъэгъуа гъэгъа лIэу­жьыгъуэщIэхэм: лимон Iэл, алое лIэужьыгъуэхэм, унэ къэкIыгъэу зэгуэр щыта тхьэмпэ къуэлэнхэм, нэгъуэщIхэми. Абыхэм иджыблагъэ къахэхутащ унэм щIамыгъэкIыу щыта гъурмыж (герань) плъыжьыбзэхэр. Ахэри къагъэкIа лIэужьыгъуэщIэщ - теплъэр къэна щхьэкIэ, гъэгъам къыдекIуэкIа мэ гуакIуэр щыуркъым, езыхэри, къыпхуэмыцIы­хужыным хуэдизу, инхэщ.  Гъэгъарэ пэт ядыдолъагъу, щIыуэ­псым езым ихъумэм селекционерхэр хэIэбэкIи, ахэр нэхъыфIи нэхъ дахи зэрахуэмыщIынур.