Белгилисича, Уллу Ата журт урушну кезиуюнде, 1942 жылны июль айында Ростов областьны Большая Мартыновка элини тийресинде немисли ууучлаучула бла къаты къазауатда 115-чи атлы дивизияны къауумунда сермешген тёрт мингден артыкъ совет аскерчи жан бергендиле. 

Бу къазауат урушну тарыхында бек кюйсюзледен эм жарсыулуладан бири болгъанды. Анда атлы аскерчилеге душман танклагъа къажау сюелирге тюшгенди. Сермешден сау чыкъгъанла бек аз болгъандыла. 
Андан сора да, 1943 жылны январь айында да экинчи уллу къазауат ётгенди бу жерледе. 
Къабарты-Малкъарны кёп жигит жашлары ол жерледе тапхандыла кеслерини къабыр юлюшлерин. Алагъа деп бу тийреде бир ненча эсгертме барды. Аланы къатларында Большая Мартыновка элде жашагъанла, совет аскерчилени эсгере, жыл сайын митингле, автопробегле да бардырадыла. Ма бу кюнледе да аллай кезиулю патриот акция ётгенди. Ёсюп келген тёлюге совет аскерчини жигитлигини юсюнден хапар айтхандыла, солдат къабырлагъа гюлле салгъандыла, ызы бла уа эл библиотекада къуралгъан кёрмюч бла шагъырей этгендиле. 
Сабий эм жаш тёлю чыгъармачылыкъны З.Налоев атлы арасыны аскер-патриот ниетде юйретиу жаны бла таматасы Беслан Гуляжинов чертгеннге кёре, Ростов областьда унутмагъанлай бизни аппаларыбызны  эсгергенлей турадыла. 
– Ийнанама бизни республикада да 115-чи атлы дивизияны жигитлиги унутулмазлыгъын, ала фашист танклагъа къажау сюелген аскерчилерибизни да хурметлей турлукъларын, – деп чертгенди ол. 

Таппасханланы Аминат.