Озгъан ыйыкъда Нальчикде А.Л. Ткаченко атлы музейде белгили коллекционер эм Илмуну бла искусствону Петровский академиясыны член-корреспонденти Хаджиланы Даниялны сурат жыйымдыгъында болгъан чыгъармаладан къуралгъан «Дуния – тик жолду» деген кёрмюч ачылгъанды.
Даниялны жашы Хасан билдиргеннге кёре, анда 150 чакълы сурат кёргюзтюлгенди. «Саулай да коллекцияда уа мингнге жууугъу барды. Ала Совет Союзну суратчыларыны ишлеридиле. Атабызны бир мураты бар эди – бек бийикде сурат галерея къураргъа. Аллах айтса, ол да болур, деп ийнанабыз», – дегенди Хаджи улу.
Кёрмючню къууанчлы ачылыууна уа КъМР-ни маданият министрини орунбасары Къарчаланы Аминат, КъМР-ни Суратчыларыны биригиуюню башчысы Жанна Канукова, «Къайсыннга жюз атлам» фондну таматасы Тетууланы Хадис, Даниял Аслановични къарындашлары, жууукълары, искусствоведле да къатышхандыла.
Хаджи улу жыйгъан суратлагъа къачанда сейир уллу болгъанды. Ма бу жол да адам аслам эди. Суратлау искусствону сюйгенле, багъалагъанла бир заманда да эссиз этип къоймайдыла Даниялны аты бла бардырылгъан кёрмючлени. Ол адет Хаджи улу дуниясын алышхандан сора да сакъланнганды.
Маданият байрамны ачаргъа уа сёз Къарчаланы Аминатха берилген эди.
– Даниял Аслановични Къабарты-Малкъарны суратлау искусствосуна этген къошумчулугъуна багъа бичген къыйынды. Ол кёп суратланы излеп, табып, алагъа жангы жашау бергенди. Суратчылагъа да эс тапдыра, кёл этдире билгенди. Андан тышында да ол къурагъан экспозицияла айырмалы эдиле. Ол аланы къурагъандан сора, хар бирини да тематикасына кёре макъам да сайлагъанды. Аны кёрмючлери сени бир сейир дуниягъа алып кете эдиле. Андан тышында да, Хаджи улу адабиятда да бек аламат кесаматчы эди. Не жаны бла да айныгъан, сейир ушакъ нёгер болгъанын а кёпле чертедиле. Бизни борчубуз а ол жыйышдыргъан хазнаны сакълауду. Бюгюнлюкде сабийлери ол ишге энчи эс бёлюпдюле, сау болсунла. Биз да къолубуздан келгенни аярыкъ тюйюлбюз, – деп белгилегенди ол.
Тетууланы Хадис а, Даниялны ыспас сёзле бла эсгерип, аны таш сураты хазыр бола тургъанын билдиргенди.
– Мында аны суратчыларыбыз ишлеген портретлери бардыла. Алай жууукъ кезиуде аны кесини таш суратын да кёрюр онгубуз боллугъуна уа бек къууанады жюрегим, – деп чертгенди Хадис Инзрелович.
Ары келгенлеге ыспас этип, Даниялны къызы Мариям сёлешгенди. Атасын унутмай, аны къыйынына бийик багъа бергенлеге жюрек ыразылыгъын билдиргенди.
– Ол жыйгъан суратланы асламы бюгюнлюкде «Эльбрусские новости» газетни редакциясыны мекямындадыла. Аны баш редактору Газаланы Зухурагъа энчи ыразылыгъымы билдирирге сюеме, бизни бла бирге бу жумушха энчи эс бёлюп, суратланы сакъларгъа кереклисин ангылап, бизге онг тапдыргъаны ючюн, – дегенди ол.
Андан сора сёлешген жазыучу эм публицист Кючмезланы Рая да Даниял Аслановични коллекциясын сакълаугъа энчи эс бёлюрге чакъыргъанды.
Эсигизге салайыкъ, «Дуния – тик жолду» кёрмюч бла 13 августха дери шагъырейленирге боллукъду.
Таппасханланы
Аминат.
