|
Хэт Мазэм… щыдыгъуэр?!
6 августа, 2023 - 07:01
Дыщысабийм балигъхэм къыджаIэрт жэщкIэ ди гъуэгугъэлъагъуэ Мазэм мэлыхъуэ иту. Ар ди фIэщ хъурт икIи тфIэгуэныхьт: мэл гуартэ ухэтми, уи закъуэкъэ? ДыкъыдэкIуэтея иужь, дауи, къыдгурыIуащ ди ЩIы дахащэм и гъусэ пэжым хьэуаи псыи (иужьрейр къыщагъуэта хуэдэу ягъэIуащ, арщхьэкIэ узыгъэунэн хуэдизкъым) зэрыщымыIэр, цIыху дэнэ къэна псэ зыIуту зыри зэрыщымыпсэур.
Абы щыхьэт техъуащ Совет Союзымрэ США-мрэ ди гъунэгъу планетэм и щхьэфэм трагъэтIысхьа Iэмэпсымэ куэдыкIейр. Ауэрэ къэхутэныгъэхэм хыхьащ нэгъуэщI къэралхэри. Дэтхэнэри хущIокъу Мазэм и къулеигъэхэм лъэIэсыну, хьэршым гъунэгъу зыхуищIыну.Хъарзынэщ: щIэныгъэр ипэкIэ кIуэтэн хуейщ. Ауэ иужь зэманым абы къыщыхъуу хуежьащ мис а щIэныгъэм зыкIи пымыщIа (нэгъуэщI мыхъуми, зэ еплъыгъуэкIэ) Iуэхухэр: Мазэм зыгуэр (е зыгуэрхэр) щодыгъуэ!
Ар зэрытелъыджэм хуэдизуи фIэщщIыгъуейщ. Япэу тхьэусыхар японхэрщ. Гугъуехьышхуэхэр пылъу зэпкъралъхьэри, абыхэм робот зэрыт зондыр яутIыпщащ. Егъэлеяуэ елIалIэурэ, Мазэм и щхьэфэм трагъэтIысхьащ, ауэ куэд дэмыкIыу… бзэхащ. Мыгувэу ар дыдэр къащыщIащ китайхэми. КНР-ми абы «иригъэшат» Iэмэпсымэ лъапIэ зытIущи, лъэужьыншэ хъуащ. Дэнэ здэкIуар?! Языныкъуэ еджагъэшхуэхэм нэхъ зытрагъащIэр дуней (къытхуэвгъэгъу, мазэ) къэхъукъащIэхэрщ (метеоритхэм зэхакъутащ е зы щIыпIэм щыхъея щхьэфэм щIилъэфащ). Ауэ ар пэжмэ, щхьэ зыри къащымыщIрэ илъэс щэ ныкъуэ ипэкIэ абы трагъэтIысхьа Iэмэпсымэхэм: мазэрызекIуэхэм, станцхэм, зондхэм? ЗыщытIысам и деж щытхэщ, я пIэ имыкIауэ. Бзэххэр Iэмэпсымэ щIэрыпсхэрщ. Апхуэдэу къыщIэкIмэ, дыгъур къыщылъыхъуэн хуейр ди ЩIырщ! АрщхьэкIэ уи нэгу къыщIэбгъэхьэну гугъущ ди планетэм икIа робот бзаджэм и нэм къыфIэнэхэр ирилъэфажьэу бгъуэнщIагъхэм щигъэпщкIуну. АтIэми, Мазэр инщ: ЩIым илъэтыкIхэри зытетIысхьэр хэхауэ зы щIыпIэкъым. Ахэр къэплъыхъуэн папщIэ Iэмэпсымэ куэдыкIей ухуейщ, лъэныкъуэ псоми щылажьэу. Ар зэкIэ зыми хузэфIэмыкIынщ.
Мыгъуэр зи мыгъуагъэращи, къэнэжыр планетэ жыжьэхэм къикIахэрщ. Уфологхэм иджы аргуэру жьэ ягъуэтащ ахэр къызэрытлъэIэсыр жаIэну. Ауэ ахэр абы нэс къыщылъэтэфкIэ сыт, щIэрыпсми, ди Iэмэпсымэхэр зэращIынур?
АпщIондэху Китайм псоми зэхахыу жиIащ и Iэмэпсымэхэр ядыгъуу зыми зэрыхуимыдэнур. Мыр Iуэху джэгукъым: зы компание гуэрым и мурадат ахъшэшхуэ зытригъэкIуэда зонд 2023 гъэм и бжьыхьэм Мазэм игъэкIуэну. АрщхьэкIэ къэшынэжащ и мылъкур лъэужьыншэу бзэхынкIэ. ЗэкIэ гуитI-щхьитIщ.
Махъшокъуэ Мухьэмэд.
|
11.05.2024 - 12:25 Зэ еплъыгъуэкIэ къыпщыхъунщ литературэр математикэм, социологием, физикэм, экономикэм, биологием, нэгъуэщI щIэныгъэхэми зыкIи емыпхауэ. |
|
11.05.2024 - 09:03 Къэбэрдей-Балъкъэрым щыщ Прохладнэ щIыналъэм и Приближнэ къуажэм зи узыншагъэкIэ сэкъат зиIэ сабийхэр щрагъаджэу дэт школ-интернат №2-м и гъэсэн цIыкIухэр къыщыхэжаныкIащ Сочи къалэм и «Сириус» фед |
|
11.05.2024 - 09:03 ТекIуэныгъэм и махуэ къэблэгъам пежьэри, Кэнжэ къуажэм иджыблагъэ дзюдомкIэ зэхьэзэхуэ щрагъэкIуэкIащ. Абы щызэпеуащ 2011 гъэм къалъхуа ныбжьыщIэхэр - псори зэхэту 113-рэ. |
|
10.05.2024 - 12:25 ЦIыхум и лъэр нихьэсащ хы лъабжьэми, къуршу щыIэм я нэхъ лъагэми, хьэршми. Ари хъунт и Iэужь къыщимынэу, щIыуэпсым хэмыIэбэу, пщIэ хуищIу щытатэмэ. |
|
10.05.2024 - 09:03 2024 гъэм накъыгъэм и 1-м къыщыщIэдзауэ къару игъуэтащ хабзэщIэм - зи пIалъэр икIа, жьы хъуа гъэшхэкIхэр, псыхэкIхэр тыкуэнышхуэхэм я кассэхэм дяпэкIэ щыпхагъэкIынукъым. |
|