Мы махуэхэм Къэбэрдей-Балъкъэрым щыIащ УФ-м Узыншагъэр хъумэнымкIэ и министерствэм РадиологиемкIэ и щIэныгъэ-къэхутакIуэ медицинэ центрым и лIыкIуэхэр. Абыхэм зрагъэлъэгъуащ республикэм и ­медицинэ IуэхущIапIэхэм я лэжьыгъэр зэрекIуэкIыр, цIыхухэм хуащIэ Iуэхутхьэбзэхэм я фIагъыр зыхуэдэми зыщагъэгъуэзащ. 

КъБР-м Узыншагъэр хъумэнымкIэ и министерствэм лэ­жьыгъэ зекIуэм кърикIуахэм теухуа зэхыхьэ щекIуэкIащ.  Ар къыщызэIуихым ведомствэм и унафэщI Къалэбатэ ­Рустам къыхигъэщащ къалэшхуэхэм щыIэ медицинэ ­центрхэм я IэщIагъэлIхэр лэжьыгъэ и пIалъэкIэ къазэры­дэгуашэм, абыхэм я чэнджэщхэм мыхьэнэшхуэ зэриIэр. РадиологиемкIэ щIэныгъэ-къэхутакIуэ медицинэ центрым и къудамэхэм я унафэщIхэу Сысоевэ Екатеринэрэ Про­сянников Михаилрэ жаIащ онкологие, урологие унэтIыныгъэхэмкIэ щIыналъэм и IэщIагъэлIхэм зыпэрыт Iуэхум фIыуэ зэрыхащIыкIыр, апхуэдэуи къагъэлъэгъуащ а узы­фэхэм япэщIэтынымкIэ цIыхухэм ящIэн хуей хъыбархэр абыхэм я деж нэхьэсынымкIэ лэжьыгъэр хъарзынэу зэ­рызэтеублар. И гугъу ящIащ «Лышх узыфэхэм пэщIэты­нымкIэ» къэрал проектымкIэ къызэрагъэпэща, а узыр зыпкърытхэм амбулаторэ дэIэпыкъуныгъэр щыхуащIэ ­центрхэм я лэжьыгъэм арэзы къызэрищIар, абыхэм сы­маджэхэм я Iуэхур зымащIэкIэ нэхъ мыхъуми къащигъэпсынщIэу зэрыщытыр.
ХьэщIэхэр щыIащ Налшык къалэ клиникэ сымаджэщ №2-м, поликлиникэ №1-м, Республикэ клиникэ сымаджэ­щым, ЩIыналъэхэм зэдай, узыфэ зэмылIэужьыгъуэхэр зыпкърытхэм щеIэзэ сымаджэщым, Республикэ клиникэ медико-хирургие центрым, Лышх узыфэхэм щеIэзэ диспансерым. Абыхэм къыхагъэщащ а IэнатIэм я мылъку-техникэ лъабжьэр иджырей жыпхъэщIэхэм тету къызэрызэгъэпэщар. Щхьэхуэу тепсэлъыхьащ Лышх узыфэхэм ще­Iэзэ диспансерым щалъэгъуахэм. Иужьрей илъэсиплIым   а IуэхущIапIэм зыужьыныгъэфIхэр игъуэтащ. «Узыншагъэр хъумэн» лъэпкъ проектым ипкъ иткIэ IэнатIэр къы­зэгъэпэща хъуащ фIагъ лъагэ зиIэ IэмэпсымэхэмкIэ. Сымаджэщым иIэщ компьютер томографу 2, МРТ, УЗИ, эндоскопие, лапароскопие, хирургие, реанимацэ аппарат, Iэмэпсымэ нэхъыфIхэр.
IэщIагъэлIхэм къыхагъэщащ медицинэ IуэхущIапIэхэм екIуалIэхэм хуащIэ Iуэхутхьэбзэхэм арэзы къызэрищIар, узыфэр и чэзум къэхутэным, клиникэ чэнджэщхэм тету ­сымаджэхэм еIэзэным хуэунэтIауэ ирагъэкIуэкI лэжьыгъэхэр къыхагъэщащ. IэнатIэм и ныкъусаныгъэхэри ­щIауфакъым, ахэри къагъэлъэгъуащ икIи апхуэдэхэр щымыгъэIэнымкIэ хэкIыпIэхэм гу лърагъэтащ, адэкIи Iуэхур зэрырагъэфIэкIуэным теухуауэ УФ-м Узыншагъэр хъумэнымкIэ и министерствэм РадиологиемкIэ и щIэныгъэ-къэхутакIуэ медицинэ центрырэ щIыналъэм и медицинэ IуэхущIапIэхэмрэ зэрызэдэлэжьэнури яубзыхуащ.

ЩхьэщэмыщI  Изэ.