Бахъсэн щIыналъэм и мэкъумэш хозяйствэхэм мы гъэм бжьыхьэсэ гуэдзу гектар мини 3,5-рэ зэрахьащ. Абы щыщу гектар минрэ ныкъуэм нэблагъэр къахыжащ. Райо­ным мэкъумэш хозяйствэмрэ ерыскъыпхъэхэмкIэ и IуэхущIапIэмрэ губгъуэ лэжьыгъэхэм сыт щыгъуи зи нэIэ тет Ныр Iэуесрэ дызэрыщагъэгъуэзамкIэ, зы гектарым хуэзэу центнер 50 - 55-рэ къытрах.

- Бэджэндырылажьэхэм яхэтщ нэхъыбэ къытезыхи. Псалъэм папщIэ, Бахъсэнёнкэ къуажэм щыщ Шырыт Тимур зы гектарым центнер 62-рэ къытрихын хузэфIэкIащ. Мэкъу­мэшыщIэхэм я дежкIэ гъэр тыншу щытакъым. Гъатхэ къииным и зэранкIэ щIым елэжьынри гъатхасэр щрагъэкIуэкIыну пIалъэри ягъэIэпхъуэн хуей хъуащ, иужькIэ абы къыхыхьэжащ щIыIэмрэ уэлбанэ кIыхьымрэ. А псоми къыхэкIыу языныкъуэ гъавэгъэкIхэм нартыхур мэлыжьыхьым и кIэм хасащ, адрейхэм хэт накъыгъэм, хэти мэкъуауэгъуэм икухэм ягъэIэбэн хуей хъуащ, ауэ абыи емылъытауэ, нартыхум ­хъарзынэу зиужьащ, - жеIэ Бахъсэнёнкэ къуажэм щыщ, мэкъумэш лэжьыгъэм илъэс куэд хъуауэ бгъэдэт Къурмэн Iэлисэхь.
Хуабэу екIуэкI мы махуэхэм нартыху хьэсэхэм псы щIагъэлъадэ, махуэ зыбжанэкIэ нартыху IэфIыр Iуахыжын щIадзэнущ. Iэлисэхь и хьэсэр гектар 30 мэхъу. Абы щыхисащ нартыху лIэужьыгъуиплI. КъищынэмыщIауэ,  иIэщ, игъэ­унэхуну хуейуэ, сэхуран лIэужьыгъуих щыхиса хьэсэ щхьэхуи. НартыхугъэкI цIэрыIуэр иджыпсту щыщIэдзауэ егъэпIейтей и хьэсэхэр мэлхьэпIатIэм тIысыпIэ зэращIам. «ИкIэщIыпIэкIэ абыхэм Iэмал къахуэдмыгъуэтмэ, апхуэдиз гугъуехьыр зэтхьэлIа гъавэм хэщIыныгъэшхуэ иратынущ, - къыхигъэщащ абы. 
Гъавэ Iухыжыным къыдэкIуэу «Агроресурсы» мэкъумэш IуэхущIапIэм и механизаторхэм иджыпсту явэ бжьыхьэсэ хьэпцIиймрэ гуэдзымрэ къызытрахыжа хьэсэхэр.

Шэрэдж Дисэ.