Бахъсэн къалэм и щэнхабзэ зыгъэпсэхупIэ паркым бадзэуэгъуэм и 27-м къыщызэIуахащ урыс усакIуэ, тхакIуэ цIэрыIуэ Лермонтов Михаил и фэеплъ. Лэжьыгъэр и Iэдакъэ къыщIэкIащ КъБР-м и СурэтыщIхэм я зэгухьэныгъэм хэт, скульптор Катони Станислав. Фэеплъыр и жэрдэмщ Бахъсэн къалэ администрацэм и Iэтащхьэ Мамхэгъ Хьэчим.
- Лермонтов Михаил щыпсэуа зэманым и цIыху къызэрымыкIуэу щытащ. Кавказым щыпсэу лъэпкъхэм я щэнхабзэр зи тхыгъэ купщIафIэхэмкIэ зыгъэбея усакIуэм фэеплъ хуэдгъэувыну хуэфащэу къэтлъытащ, - жиIащ Мамхэгъ Хьэчим, мы Iуэхум щхьэкIэ къызэхуэсахэм захуигъазэу.
Фэеплъыр къызэIухыныр бадзэуэгъуэм и 27-м щIрагъэхьэлIам и щхьэусы-гъуэр - зэфIэкI къызэрымыкIуэ зиIэ усакIуэшхуэр гуузу а махуэм Пятигорск (Псыхуабэ) къалэм зэрыщаукIарщ. Ар пасэу, и ныбжьыр илъэс 27-м иту ду-нейм ехыжащ. Абы и гъащIэр тыншу щытакъым: и анэр пасэу фIэкIуэдащ, и адэм пэIэщIэу и сабиигъуэр ихьащ, и усыгъэхэр, щхьэхуитыныгъэр зэригъэлъапIэр щхьэусыгъуэ къыхуащIу зи тетыгъуэхэм зэхэзехуэн ящIащ.
Зэрыпсэуа зэман мащIэм Лермонтовым гупсысэ куу зыщIэлъ усэ куэд и къалэмыпэм къыщIэкIащ. Абы и гъащIэм къыгуэхыпIэ имыIэу щытащ Кавказыр. И тхыгъэ нэхъыфIхэр щитхари ди щIыналъэрщ. Кавказ лъэпкъхэм ди хабзэхэм, уэрэдхэм, хъыбархэм, щIыуэпсым и дахагъэм дахьэхырт усакIуэр. Псом хуэмыдэу адыгэхэр фIыуэ дыкъилъагъурт. Шэрджэс зауэлIхэм пщIэшхуэ яхуищIырт.
Фэеплъыр къыщызэIуахым зыкърагъэхьэлIащ КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и Правительствэм-рэ министерствэхэмрэ я лIыкIуэхэр, КъБР-м егъэджэныгъэмрэ щIэныгъэмкIэ и министр Езауэ Анзор, КъБР-м щэнхабзэмкIэ и министрым и къуэдзэ Карчаевэ Iэминат, КъБР-м и цIыхубэ артист, УФ-м гъуазджэхэмкIэ щIыхь зиIэ и лэжьакIуэ ХьэIупэ ДжэбрэIил, УФ-м и цIыхубэ ар-тист Тут Заур, КъБР-м и цIыхубэ артистхэу Думэн Мурадинрэ Зеушэ Iэуесрэ, КъБР-м и цIыхубэ усакIуэ Ацкъан Руслан, егъэджэныгъэ, щэнхабзэ IуэхущIапIэхэм я лэжьакIуэхэм, къалэдэсхэм.
Лермонтов Михаил и фэеплъыр къызэIуаха нэужь, ныбжьыщIэхэр абы и усэ-хэм щыщ къеджащ, уэрэд жаIащ, къэфащ. А псор зэфIэкIа нэужь, фэеплъым удз гъэгъахэр тралъхьащ. Ар цIыху кIуапIэ зэрыхъунум шэч хэлъкъым.
БЖЬЫХЬЭ Розэ.