КъМР-де МВД-ны коллегиясыны жыйылыуунда ведомствону къуллукъчулары жылны аллындан бери тамамлагъан ишни эсеплери чыгъарылгъандыла. Тюбешиуде ачыкъланнган шартла бла байламлы ич ишле министрни  къуллугъун толтургъан полицияны полковниги Назир Мамхегов тийишли буйрукъла бергенди. 

Жылны аллындан бери тамамланнган жумушланы эм келир кезиуге борчланы юслеринден КъМР-де МВД-ны штабыны оноучусуну къуллугъун толтургъан ич службаны майору Жолаланы Замир доклад этгенди. Ол билдиргенича, бу кезиуде министерствону къуллукъчулары жамауат къоркъуусузлукъну, законлукъну бла тынчлыкъны сакълау борчланы толтургъандыла. Жылны биринчи жарымында жамауат аслам жыйылгъан жерледе бла орамлада аманлыкъла азайгъандыла.
Ангылатыу жумушла  хайыр келтиргенлерин да белгилегенди ол. Сёзге,  кеф болуп этилген бузукълукъланы саны 57,9 процентге  тюшюрюлгендиле. Наркотиклени законсуз сатыу-алыу, экономика, коррупция дегенча аманлыкъланы тохтатыугъа бурулгъан мадарла да хайыр келтиргендиле.  Законсуз ичги затланы сатыу, жашау журт-коммунал мюлкде аманлыкъла да аз болгъандыла.
Жыйылыуда КъМР-де МВД-ны полициясыны башчысыны орунбасары Анахаланы Кязим, жамауат къоркъуусузлукъну жалчытыу бёлюмню башчысы Радион Арахов, дознанияны къурау бёлюмню оноучусу  Мурат Пшеунов, следствие управленияны бёлюмюню таматасы Римма Ойтова да сёлешгендиле.
Докладлагъа тынгылагъандан сора, КъМР-де ич ишле министрни къуллугъун толтургъан Назир Мамхегов тийишли эсгертиуле этгенди, бёлюмлени башчыларына буйрукъла бергенди. Ахырында келир кезиуге борчла салыннгандыла.