Быйыл Элбрус районну тёрт окъуу учреждениясында  тынгылы ремонт бардырылады. Тырныаууз шахарны 3-чю номерли орта школу да аланы санындады. 
Анда халны кёрюр мурат бла Темуккуланы Асият, мектепде болуп, биригиуню инженери Тотрукъланы Рамазан бла ушакъ бардыргъанды.
– Рамазан, бу объектни ремонт ишлери къачан башланнгандыла?
– Элбрус районну эки билим бериу учреждениясыны ремонт ишлерин бардырыргъа тендерни хорлап, «Спецстройкоммуникации» ООО ССК 3 апрельден бери Быллым элни орта школунда бла Тырныаууз шахарны 3-чю номерли мектебинде жангыртыу ишлени башлагъанбыз. Андан сора тамамланыллыкъ жумушланы болжалларын тохташдыргъанбыз.
– Къаллай къурулуш биригиуле бла ишлейсиз?
 – Фирмабызны  штаты уллуду. Кёп  ишлени кесибиз бардырабыз. Хар бирине  жарарыкъ ишчи кереклерибиз да бардыла. Ток  ызланы жангыртыуда, жылыу системаны къурауда да жумушланы кесибиз тындырабыз. Алай мекямны тышын жангыртыугъа уа аты иги бла айтылгъан, аламат иш сынамы болгъан фирманы чакъыргъанбыз. Ала жууаплы толтура турадыла ишлерин.
– Къурулушну бардыргъан  тынч тюйюлдю, бютюнда бусагъат заманда. Материалланы багъалары хар кюнден  кётюрюледиле. Анга кёре къоранчларыгъыз алгъындан белгиленнген ёлчемле  бла келишемидиле?
– Биринчиден, контрактха кёре 3-чю номерли школгъа деп, 79 миллион бла жарым, Быллымны школуна уа 28 миллион сом  бёлюннгенди. Бу ёлчемле юсюбюздеги жылны биринчи кварталында къабыл этилгендиле. Биз а ишлени экинчи, ючюнчю кварталлада бардырабыз. Аны себепли материалланы багъалары сюйгенибизча болмайдыла. Алай фирма кесини ишин тохтаусуз бардырады. Тынгылы сертификатлы керекле алынадыла. Бу ишде ол бек магъаналыды. 
Чырмау недеди десегиз, белгиленнген кёп жумушла чыкъгъандыла. Ол чыракъланы, ток ызланы, жылыу берген, канализация системаланы да жангыртыуду. Алай аласыз ишни андан ары бардырыр онг жокъду. Аны себепли фирма кёп ишни кеси амаллары эм кючю бла тындыргъанды. 
– Белгиленнген  ахчаны къаллай бирин хайырланнгансыз бюгюннгю кюннге?
– 95 процентин, дерге боллукъду. Алай ишлени да аллай бири жалчытылыннганды. Бюгюнлюкде школну ичинде окъуу классла хазырдыла, аш-азыкъ жарашдырылгъан, сабийле ауузланнган отоула  да битипдиле. Ариу боялып, оборудованиясы да салыннганды. Энди тапкаланы жарашдыра турабыз. Школну мекямы уллу болгъаны себепли, кёп кюч салыргъа тюшгенди. Ишчиле эки сменде эрттенликде алтыдан башлап, ингирликде онбирге дери тохтамай ишлейдиле.
 Дагъыда тырныауузчу жаш тёлюге да, жай солууларында келип, заманларын бошуна кетермей,  ишлеп, хакъ алыр онг къурагъанбыз. Онбешге жууукъ жаш урунады. Хакъларын тыймай, заманында кереклисича алгъанлары ючюн да  бек ыразыдыла. Былай тири ишлеуде, объектни бир 10 кюннге хазырлар  умутлубуз. 
– Мекямны тыш кёрюмдюсю къаллай боллукъду? Арбазын тапландырыу бу проектге киремиди?
– Алгъындан, жаланда тазалап, бояп къояргъа деп келишим болгъанды. Сора Элбрус районну администрациясыны таматасыны къуллугъун толтургъан Сотталаны Къурман бла кезиулю кенгешибизде мектепни ал бети  андан узакъ болмай орналгъан эм тынгылы ремонт этиле тургъан Маданият юйню тыш кёрюмдюсю бла келиширге кереклисин тохташдыргъанбыз. Андан сора  Къурман Сейитович Жарыкъландырыу  эм илму министерство бла ол энчиликни сюзюп, республиканы  Башчысы Казбек  Коков бла да кенгешип, мекямны эрттегили сыфатын бузмай,  бир архитектура къауумгъа  сыйынырча, аллай материал бла тышлай турабыз. Заказчыла да ыразыдыла. 
Арбазны тапландырыу ишле уа бизни боюнубузда тюйюлдюле. Алай биз аны да болгъаныча къоймакъ. Фирманы къолайына  кёре тап халгъа  келтирирге келишгенбиз. Артда уа администрация  къоранчларыбызны къайтарыргъа  айтханды. Бусагъатда ол ишле  къыстау бардырыла турадыла. Ишни башында бек жууаплы къурулушчу Шауталаны Ахмат тургъаны себепли, не жаны бла да тынгылы болгъанына ишеклик жокъду. 
– Быллымны школунда  хал а къалайды?
– Кертисин айтханда, бек осал эди. Биринчиден, сабийлени быллай школгъа жюрюп, окъугъанлары бизни бек жарсытханды. Алай билген амалыбыз бла, аны  республиканы эм иги школларындан артха къалмазча этерге кюрешебиз. Бюгюнлюкде, отоуланы башлары  тап этилгендиле, къабыргъалары тюзетилгендиле, полларына ламинат эм керекли жерледе уа иги плитка салыннганды.  Жылыу баргъан быргъыланы  саулай  алышханбыз. 
Материал сайлауда да элни администрациясыны таматасы бла, школну коллективи бла да кенгешгенбиз. Аланы оюмларына кёре алыннганды хар зат да. Кеслери ыразы болурла деп ышанабыз. Мекямны тышы да ишлене турады. Былай къарагъанда, къурулуш ишлени 95 проценти мында да тамамланнганды дерге боллукъма. Бу объектни да 10 августха   хазырлар умутдабыз.
Фирмабызны таматасы  Жангоразланы Ислам, жаш эсе да, башды. Хар тутхан ишибизни тынгылы этилирин излейди. Ашыгъыргъа, неда учузуракъ материалланы хайырланыргъа къоймай, ма бу школланы  кеси жокълап,  алай кетеди. Аны себепли, Аллах айтса, быйыл мингден аслам сабий ариу, жылы, жангыртылгъан мекямлагъа сюйюп келирле эм иги окъурла деп ышанабыз. 
 – Ишигизде сизни къууандыргъан  не затды?
– Биринчиден, районну администрациясыны башчысына  жюрегимден ыспас этерге сюеме. Нек десегиз, уллу кёллю болуп къалмай, хар кюнден, сагъат жетиде келип, ишлени къалай этиле тургъанларына къарайды, небиз кем болгъанына  уллу эс бурады. Жаланда аны ётгюрлюгюню бла, районну болумуна кёл салыууну, жарсыууну хайырындан  быйыл анча мекямны тынгылы ремонту жалчытылгъанды. Ол бек махтаулуду. Биз, не соруу бла барсакъ да, амалла излеп, табып, бизни бла тюз келишим этгенди. Сау болсун!
Дагъыда, школну таматасы, Любовь Шарафиевна мени эсимде керти да ишин сюйген, анга саулай жюреги бла берилген таматача къаллыкъды. Эрттен сайын келип, кече белине дери хар жерни жокълап, айтханыбыз бла келишип, алай ишлегенди. Сабийлеге терен сюймеклигини шартыды ол. 
Хар адам да тутхан ишин тынгылы жалчытса, жашау игиге айланыр деригим келеди.