«Китап окъуучу Нальчик» деген проектни чеклеринде республиканы Маданият фондунда «Сёз байлыкъ» деген ат бла поэзияны ингири ётгенди. Адабият ингирни Маданият фонд бла Китапны сюйгенлени биригиую бирге къурагъандыла. Анга поэзияны сюйген кёп жаш адам келгенди. Аланы араларында клубну келечилери Дарья Шомахова, Аслан Рахмонов, Марина Мазуренко, жырла жазыучу эмда кеси жырлаучу Жолдашланы Азнор да бар эдиле.
Поэзияны байрамын къурагъанла ары дагъыда Шимал Осетия-Аланиядан эмда Дагъыстандан да къонакъланы чакъыргъандыла. Аланы араларында поэтессала Индира Зубаирова эмда Лаура Хамциева да бар эдиле.
Тюбешиуню кезиуюнде жаш поэтле назмуларын окъугъандыла, поэзияны юсюнден оюмларын да айтхандыла. «Горянка» газетни баш редактору Зарина Канукова, жазыучу Болатланы Юруслан эмда Къудайланы Лейля бир жолгъа быллай бир жаш фахмуну кёргенлерине къууаннганларын жашырмагъандыла. Зарина Канукова уа назму жазгъан, окъугъан жашла бла къызла хар бири да, башхагъа ушамай, поэзияда энчи жоллары бла баргъанларын, бютюнда бег а кеслерини, республикада атлары айтылгъан къабартылы, малкъарлы поэтлени да чыгъармаларын артистлеча ариу окъугъанларын чертгенди. «Быллайгъа алай кёп тюберик тюйюлсе, сиз керти да башхалагъа ушамагъан адамласыз»,– дегенди.
Болатланы Юруслан а жаш адамлагъа фахмуларын быллай аламат назму ингирледе кёргюзтюрге онг чыкъгъанын бек игиге санагъанды. «Бек башы – чыгъармачылыкъгъа жюрегигиз тартыргъа, аны магъанасын сезерге керексиз», дегенди.
Аладан сора Жолдашланы Аслан кеси жазгъан жырланы айтханды, Лидия Кудашева уа назмуларын окъугъанды.
Омакъ жасалгъан залда олтургъанланы араларында жашаулары келгенле, кёпню кёргенле, билгенле да бар эдиле. Ала назмула жазмай эселе да, поэзия бла шагъырейдиле. Абадан тёлю жашлагъа бла къызлагъа насийхат сёзлерин айтыу бла чекленип къалмай, Къулийланы Къайсынны, Расул Гамзатовну, Мустай Каримни, Давид Кугультиновну, Алим Кешоковну, Анатолий Бицуевну, Зумакъулланы Танзиляны, Беппайланы Муталипни, Бабаланы Ибрагимни, дагъыда кёп башхаланы назмуларын кёлден да айтхандыла, окъугъан да этгендиле.
Ингир жарыкъ макъамла бла бошалгъанды. Жаш назмучула уа фондну атындан саугъала къоллу да болгъандыла.
Холаланы Марзият.
