|
ЩIэныгъэ куурэ зэфIэкI лъагэрэ зыбгъэдэлъхэр
31 июля, 2023 - 05:36
КъБР-м Егъэджэныгъэмрэ щIэныгъэмкIэ и министерствэм гуфIэгъуэ зэIущIэ щекIуэкIащ. КъБР-м и Iэтащхьэм къыбгъэдэкI саугъэтыр, щытхъу, фIыщIэ тхылъхэр абы щратыжащ 2022 - 2023 гъэ еджэгъуэм ШколакIуэхэм я урысейпсо олимпиадэм пашэ щыхъуахэм, апхуэдэуи абы къриубыдэу анэдэлъхубзэхэмкIэ екIуэкIа щIыналъэпсо зэпеуэхэм щытекIуа, къыхэжаныкIа ныбжьыщIэхэм, ахэр зэпеуэхэм хуэзыгъэхьэзыра егъэджакIуэхэм.
ЗэIущIэм хэтащ КъБР-м егъэджэныгъэмрэ щIэныгъэмкIэ и министр Езауэ Анзор, а министерствэм къепхауэ лажьэ Жылагъуэ советым и пашэ Сэхъурокъуэ Хьэутий, егъэджэныгъэ IэнатIэм пэрыт лэжьакIуэхэм я щIыналъэпсо зэгухьэныгъэм и унафэщI Карныш Сергей сымэ, нэгъуэщIхэри. Зэхуэсыр къызэIузыха Езауэ Анзор абы кърихьэлIа школакIуэхэмрэ егъэджакIуэхэмрэ гуапэу ехъуэхъуащ щIыналъэпсо зэпеуэм и утыку щызыIэрагъэхьа ехъулIэныгъэ лъагэхэм папщIэ.
- ШколакIуэхэм я урысейпсо олимпиадэм и кIэух зэпеуэм нэсащ икIи текIуэныгъэ къыщахьащ ди еджакIуэхэм, призёр хъуахэри яхэтщ. Апхуэдэ ехъулIэныгъэхэм я фIыгъэкIэ Къэбэрдей-Балъкъэрыр яхэхуащ Кавказ Ищхъэрэ, Ипщэ федеральнэ щIыналъэхэм нэхъыфIу къыщалъыта субъектищым, - къыхигъэщащ министрым. - Си гуапэу сынывохъуэхъу ди республикэм и щIыхьыр къэралпсо утыкум щызыIэта ныбжьыщIэхэм. Апхуэдэуи фIыщIэ ин яхузощI абыхэм я щIыбагъ къыдэт егъэджакIуэхэм, текIуэныгъэ лъагэхэм дыхуэзышэ егъэджэныгъэ-гъэсэныгъэ лэжьыгъэ купщIафIэхэр щекIуэкI еджапIэхэм я унафэщIхэм. МурадыщIэхэр зыхуэвгъэувыж, ахэр зыIэрывгъэхьэнымкIи флъэкI къэвмыгъанэ.
Езауэм зэрыжиIамкIэ, олимпиадэм и щIыналъэпсо зэпеуэр предмет 22-кIэ екIуэкIащ икIи хэтащ школи 153-м къикIа цIыху 247-рэ. Абыхэм ящыщу еджакIуэ 16-р нэсащ зэпеуэм и кIэух Iыхьэм. Апхуэдэхэм яхэхуащ ди лъахэм и ныбжьыщIи 4. Ар узыщыгуфIыкI хъуну IуэхугъуэфI дыдэщ.
ЩIэныгъэ куурэ зэфIэкI лъагэрэ зыбгъэдэлъ ди лъахэгъу ныбжьыщIэ 48-рэ щагъэлъэпIащ зэхуэсым. Абыхэм яхэтщ ди республикэм и курыт школхэм, колледжхэм щIэсхэр. Урысейпсо утыкум щIэныгъэфI къыщызыгъэлъагъуэу зэпеуэм щытекIуахэм я нэхъыщIэ дыдэщ физикэмкIэ къэралпсо зэпеуэм и кIэух Iыхьэм нэсу пэрыт хъуа Къалэ Самир. Илъэс 14 фIэкIа мыхъуа щIалэщIэр «ДыгъафIэ къалэм» къедза лицейм щоджэ, зэфIэкI лъагэхэр къигъэлъагъуэу. Самири олимпиадэ зэмылIэужьыгъуэ-хэм щытекIуа апхуэдэ ныбжьыщIэхэми иратыжащ КъБР-м и Iэтащхьэ КIуэкIуэ Казбек игъэува саугъэтхэмрэ КъБР-м Егъэджэныгъэмрэ щIэныгъэмкIэ и министерствэм къыбгъэдэкI щIыхь, фIыщIэ тхылъхэмрэ. Ахэр Iэгуауэшхуэм щIэту ныбжьыщIэхэм IэщIалъхьащ Езауэ Анзор, Сэхъурокъуэ Хьэутий, Карныш Сергей сымэ.
ФIыщIэ ябгъэдэлъщ школакIуэ зэчиифIэхэми ахэр зэпеуэм хуэзыгъэхьэзыра я егъэджакIуэ гумызагъэхэми. А IэщIагъэлIхэм ныбжьыщIэхэм я гъащIэм мыхьэнэшхуэ зэрыщаубыдыр и псалъэм къыхигъэщащ Сэхъурокъуэ Хьэутий. Абы зэрыжиIамкIэ, егъэджэныгъэм къыгуэхыпIэ имыIэу епха гъэсэныгъэ Iуэхуми лэжьыгъэшхуэ щызэфIах иджырей школ IэщIагъэлIхэм. Аращ куэдкIэ зэлъытар къэралым къихъуэ щIэблэр хэкупсэу, щалъхуа щIыналъэм и къыщхьэщыжакIуэ нэсу къэгъэтэджыныр. ЩIэблэм унэтIакIуэ яхуэхъу а егъэджакIуэфIхэми, олимпиадэхэм щытекIуа ныбжьыщIэхэр зыщыщ еджапIэхэм я унафэщIхэми иратащ КъБР-м Егъэджэныгъэмрэ щIэныгъэмкIэ и министерствэм къыбгъэдэкI щIыхь тхылъхэр, саугъэтхэр. Шэч хэмылъу, зэIущIэм щагъэлъэпIа дэтхэнэми хуэфэщэн хэлъхьэныгъэ хуищIащ ди щIыналъэм и егъэджэныгъэ IэнатIэм адэкIи зиужьыным.
ТАМБИЙ Линэ.
|
12.05.2024 - 09:03 КъБР-м и Сабий, щIалэгъуалэ творчествэ унэм иджыблагъэ щекIуэкIащ урысейпсо зэIущIэ. |
|
11.05.2024 - 12:25 Зэ еплъыгъуэкIэ къыпщыхъунщ литературэр математикэм, социологием, физикэм, экономикэм, биологием, нэгъуэщI щIэныгъэхэми зыкIи емыпхауэ. |
|
11.05.2024 - 09:03 Къэбэрдей-Балъкъэрым щыщ Прохладнэ щIыналъэм и Приближнэ къуажэм зи узыншагъэкIэ сэкъат зиIэ сабийхэр щрагъаджэу дэт школ-интернат №2-м и гъэсэн цIыкIухэр къыщыхэжаныкIащ Сочи къалэм и «Сириус» фед |
|
11.05.2024 - 09:03 ТекIуэныгъэм и махуэ къэблэгъам пежьэри, Кэнжэ къуажэм иджыблагъэ дзюдомкIэ зэхьэзэхуэ щрагъэкIуэкIащ. Абы щызэпеуащ 2011 гъэм къалъхуа ныбжьыщIэхэр - псори зэхэту 113-рэ. |
|
10.05.2024 - 12:25 ЦIыхум и лъэр нихьэсащ хы лъабжьэми, къуршу щыIэм я нэхъ лъагэми, хьэршми. Ари хъунт и Iэужь къыщимынэу, щIыуэпсым хэмыIэбэу, пщIэ хуищIу щытатэмэ. |
|