Сиз юй неда автомашина сатсагъыз, къолгъа тюшген ахчадан налог тёлерге тюшерикди. Алай бир-бирледе уа инсан ол борчдан къутулургъа боллукъду. Къалай? Аны юсюнден объясняем.рф порталда ма бу материал басмаланнганды.

Жашау журт сизде иеликде юч жылдан артыкъ тургъан эсе, аны ючюн налог тыйыллыкъ тюйюлдю. Излемле ма быладыла:

- юй сизге башхадан къалгъан эсе;

- жууукъ адамыгъыз аны сизге саугъагъа берген эсе;

- аны приватизациясы этилген эсе;

- сизде иеликде болгъан жангыз бир юй эсе.

Аладан башха кезиуледе юйню налог тёлеуден къутулуп сатар ючюн, ол сизде иеликде эм азындан беш жыл турургъа керекди.

Налог декларация бериуден адам дагъыда ма бу кезиуледе эркин болады:

- жеринден тепмеген мюлкню (юй, фатар, жер эм башха объектле) багъасы бир миллион сомдан артыкъ тюйюл эсе;

- дачаны, гаражны, машинаны салыучу жерни багъасы 250 минг сомдан артыкъ тюйюл эсе;

- сатылгъан мюлк иеликде эм азындан юч жыл туруп, багъасы да 250 минг сомдан озмагъан эсе;

- НДФЛ тыйылмагъан файдадан, сёз ючюн, иш хакъдан;

Сабийлери болгъан юйюрле юйлерин сатсала, налог тёлемейдиле:

- сабийле акъылбалыкъ тюйюл эселе неда 24 жыллары толмагъан студентле (очно халда окъугъан) эселе;

- жашау журтну кадастр багъасы жангы юйню багъасындан аз неда 50 миллион сомдан артыкъ тюйюл эсе;

- жангы юй сатылгъан юйден уллу эсе;

- келир жыл 30 апрельге дери жангы юй сатып алыннган эсе неда аны къурулушуну багъасы толусунлай тёленнген эсе;

- сатхан сагъатда налог тёлеучюню неда аны юйдегилерини ол жашау журтну эки тенгинден асламысына иелик эркинликлери жокъ эсе.

Омарланы Мурат хазырлагъанды.