2030 жылда айлыкъны эм аз ёлчеми (МРОТ), бюгюннгю тарихле бла тенглешдиргенде, эки кереге кёбейтилликди. РФ-ни Урунуу министерствосу келир жылдан хакъны аз-задан кётюрюу жаны бла законну проектин хазырлагъанды.

 Документге тийишлиликде, МРОТ   18,5 процентге ёсдюрюлюп,  19 242 сомгъа жетдирилликди. Бу мадарла РФ-ни Президентини буйрукъларыны чеклеринде бардырыладыла. Аны бла бирге   МРОТ-ну   кёбейтиуге  2,4 триллион сом керек боллукъду. Ахчаны бир жартысы  Миллетни къолайлыгъыны фондундан бёлюнюрюкдю.    Къалгъаны налог тёлеуню жангыртылгъан низамыны хайырындан жыйыллыкъды. 

Экспертлени акъылларына кёре, МРОТ-ну кёбейтилгени бла къыралда чыгъарылгъан продукцияны ёлчеми (ВВП) 0,8 проценте ёсерикди. Аны бла бирге уа  демографияда иги жанына тюрлениуле боллукъларына ышанадыла.

 Келир жылдан а айлыкъ  30 мингнге жетмеген кезиуде, налог алынмазгъа боллукъду.  Ол жаны бла  законну проектин ЛДПР Къырал Думаны депутатларыны къараууна бергенди. Аны жарашдыргъанланы акъылларына кёре, бу мадар юйюрлени къолайлыкъларын игилендирликди.  Парламентарийле законну къабыл кёрселе, ол кючюне 2024 жылда кирлиги белгиленеди.      

Тикаланы Фатима хазырлагъанды.