«ГосСтарт» федеральнэ программэр Урысейм и Президентым и унафэкIэ ягъэхьэзыращ. Ар къыщыхалъхьауэ щытащ 2022 гъэм дыгъэгъазэм и 22-м УФ-м и Къэрал Советым и зэIущIэм. ПрограммэмкIэ я мурадыр щIалэгъуалэр къэрал, муниципальнэ къулыкъум дегъэхьэхынырщ. Программэм хэтыну хуитщ илъэс 18 - 35 зи ныбжьхэр. Абы унэтIыныгъэ зыбжанэ иIэщ: щIалэгъуалэмрэ студентхэмрэ къулыкъущIэхэм яхуэгъэзэныр; федеральнэ, щIыналъэ къулыкъущIапIэхэм щекIуэкI лэжьыгъэм ныбжьыщIэхэм зыщагъэгъуэзэну Iэмал етыныр; къэрал IэнатIэ Iутхэр псапэ зыпылъ Iуэхухэм зэрыхэтым и щапхъэхэр гъэлъэгъуэныр; къулыкъущIэ ныбжьыщIэхэм я щIэныгъэр щыхагъэхъуэн программэ щхьэхуэ гъэбелджылыныр; щIалэгъуалэм папщIэ зэхыхьэхэр егъэкIуэкIыныр; къэрал, щIыналъэ гъэзэщIакIуэ органхэм деж щIалэгъуалэм зыщагъасэ, щычэнджащэ утыкухэр къащыхузэгъэпэщыныр.

«Дэ дащогугъ Урысейм и щIалэгъуалэм - абыхэм я гупсысэм, хэлъэтым, я мурадхэр зыIэрагъэхьэну зэрафIэфIым, зыгуэрым ищIэнум пэмыплъэу, езыхэр лэжьыгъэм зрапщыту ехъулIэныгъэ зыIэрагъэхьэну зэрыхьэзырым» мы псалъэхэр къыщыхьащ Урысей Федерацэм и Президент Путин Владимир къыхилъхьа программэм папщIэ къызэIуаха интернет напэкIуэцIым.

Иджыблагъэ, ЩIалэгъуалэм я махуэм ирихьэлIэу, «Росмолодёжым» къалэ зыбжанэм щагъэбелджылащ проектышхуэм и Iыхьэ щхьэхуэхэр.

- Къэралым хуэлэжьэну гупыж зыщI ди щIалэгъуалэм гъуэгу етыпхъэщ. Абыхэм лэжьыгъэм зыщагъэгъуэзэну Iэмал яIэн хуейщ, щIэныгъэм хагъэхъуэн, къулыкъу зэрагъэгъуэтын папщIэ. Мы проектыр куэдым щIэдзапIэ зэрахуэхъунум, къэрал къулыкъум пэрытын цIыху губзыгъэхэр абы и фIыгъэкIэ къызэрытхэхъуэнум шэч къытесхьэркъым, - жиIащ «ГосСтарт»-м стажировкэмкIэ и унэтIыныгъэм теухуауэ ЩIалэгъуалэм я IуэхухэмкIэ федеральнэ агенствэм и унафэщIым и чэнджэщэгъу Литвиненкэ Егор.

«ГосСтарт» федеральнэ программэм и ухуэкIэм, къуит Iэмалхэм зыхагъэгъуазэ Къэбэрдей-Балкъэрым и щIалэгъуалэми.

ГУГЪУЭТ Заремэ.