КъБР-м и Парламентым и ЩIалэгъуалэ палатэм и 8-нэ зэхыхьэгъуэм и япэ зэIущIэр екIуэкIащ. Ар къызэIуихащ Парламентым и УнафэщIым и къуэдзэ Къардэн Мурат. 

- ЩIэуэ зэхыхьа ЩIалэгъуалэ палатэм мыр и щыпэ зэIущIэщ. Сынывохъуэхъу IуэхущIафэ дахэ фиIэну, ехъулIэныгъэ къэвгъэлъэгъуэну, зэфIэкIхэмкIэ дывгъэгуфIэну, дызэрыфщыгугъыу фыкъыщIэкIыну. ЩIалэгъуалэ палатэм фи япэкIэ Iуэху щхьэпэхэр ялэжьащи, абыхэм пыфщэну, евгъэфIэкIуэну, щIэщыгъуагъ хэфлъхьэну дыхуейщ. Дэ чэнджэщэгъуи гъуэгугъэлъагъуи дыфхуэхъу­нущ. ФокIадэм щегъэжьауэ хэкъузауэ Iуэхум фыпэрыувэнущи, жэуаплыныгъэ фхэлъу фылажьэ, - яжриIащ Къардэн Мурат щIалэгъуалэм. 
- Нобэ щегъэжьауэ фэ фылэжьэнущ. Дыф­щогугъ ЩIалэгъуалэ палатэм хэтхэр фы­зэкъуэту, фызэчэнджэщу, фи зэфIэкI вгъэлъагъуэу Iуэху зэдэфщIэну, - еущиящ КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и унафэщI Емуз Нинэ. Ар теп­сэлъыхьащ ЩIалэгъуалэ палатэм и зэIущIэхэр зэрекIуэкI щIыкIэм, зэманыр зэрызэпалъытым, ящIэнур зэрагъэбелджылым. 
ЩIалэгъуалэ палатэм и унафэщIу зэдэарэзыуэ хахащ АфэщIагъуэ Анзор. Абы и къуэдзэ ящIащ Ащхъуэт Алинэ, Зэбакъ Азэмэт, Морозовэ Дарье сымэ. Жэуап зыхь секретарь IэнатIэм пэрытынущ Даур Дианэ. УФ-м и Федеральнэ Зэхуэсым ФедерацэмкIэ и Советым и ЩIалэгъуалэ палатэм ­КъБР-м и Парламентым и ЩIалэгъуалэ палатэм къыбгъэдэкIыу хагъэхьащ Щыхь­мыр­зэ Муртаз. 
КъБР-м и Парламентым и ЩIалэгъуалэ палатэм и унафэщIу хаха АфэщIагъуэ Анзор КъБКъУ-м ИнформатикэмкIэ, электроникэмрэ робототехникэмкIэ и институтым ­электроникэмрэ бжыгъэм тет информацэ технологиехэмкIэ и кафедрэм и инженерщ. 
- Япэрауэ, фIыщIэ фхузощI, дзыхь къызэвгъэзу IэнатIэр къызэрысхуэвгъэфэщам ­папщIэ. Си щIэныгъи зэфIэкIи есхьэлIэу Iуэ­хум сыпэрытыну фыкъызогъэгугъэ. Си гугъэщ сэбэп сыхъуфыну Iуэху щхьэпэхэр дгъэкIуэтэнымкIэ, проектхэр пхыдгъэ­кIынымкIэ. Къапщтэмэ, зыкъом щIауэ жылагъуэ Iуэхум сыпэрытщ, проектхэр зэра­гъэкIуа­тэм и пIалъэм хызощIыкI. 2020 гъэм щегъэ­жьауэ 2023 гъэ пщIондэ КъБР-м и Парламентым экономикэмкIэ, щIалэгъуа­лэм я хьэрычэт Iуэхухэмрэ лэжьыгъэмкIэ и комиссэм и унафэщIу сыщытащ. Бжыгъэм тет экономикэмкIэ, технологиехэмрэ инновацэхэмкIэ УФ-м и Къэрал Думэм и ЩIалэ­гъуалэ Парламентым и эксперт гупым мы гъэм сыхагъэхьащ. Сыт сэ ЩIалэгъуалэ палатэм щызлэжьынур жыпIэмэ, япэрауэ, IэщIагъэ зэхуэмыдэ зиIэхэм я щIэныгъэ гупсысэ зэхэдзэ щащI зэIущIапIэхэр сщIыну сыхуейщ. ЕтIуанэрауэ, егъэджэныгъэ прог­раммэхэр згъэкIуэтэнущ. Ещанэрауэ, цIы­ху­хэм я псэукIэр ефIэкIуэным теухуауэ щIалэгъуалэм жэрдэм ящIыфу езгъэсэну си гугъэщ. Мы зэманым сызэлэжь проектхэри сиIэщ, - жиIащ АфэщIагъуэм.