Урысей МЧС-м и управленэ нэхъыщхьэм КъБР-м щиIэ къудамэм и лэжьакIуэхэщ ­Бакъейхэ Iэмырбийрэ ФатIимэрэ. Iэмырбий Воронеж къалэм 2006 ­гъэм къыщиухащ Урысей МЧС-м и мафIэс-техникэ ­училищэр, 2012 гъэм Урысей МЧС-м и академиер. Урысей МЧС-м IэнатIэ зэрыIухьэрэ ар инспек­тору, дознавателу, хъумакIуэхэм я унафэщIу лэ­жьащ. Иджыпсту ар гъэсэныгъэ лэжьыгъэ­хэ­мрэ егъэ­­джэныгъэмкIэ къудамэм и инс­пектор нэхъыжьщ. 

Iэмырбий МЧС-м здэлажьэм, курыт еджапIэм къэп­щытэныгъэ IуэхукIэ ягъэкIуауэ къицIыхуащ ­щхьэгъусэ хуэхъуа ФатIимэ. НэхъапэIуэкIэ ар еджапIэм тхыдэмкIэ и егъэджакIуэу лэжьащ. Мы зэманым ар псыхэм цIыхухэм я шынагъуэншагъэр къыщызэгъэ­пэщынымкIэ къудамэм и инспекторщ. 
- Ди лэжьыгъэр IэщIагъэ нэхъыфIхэм ящыщу къы­золъытэ. Сабийхэм зыщагъэпскIкIэ шынагъуэншагъэм теухуауэ ящIапхъэ Iэмалхэм хызогъэгъуазэ, - жеIэ ФатIимэ. - Лэжьыгъэм ды­­пэрытыху сабийхэр гъэ­сапIэм щыIэщ. Дауд илъэситху мэхъури, и адэм хуэдэу къегъэлакIуэ хъуну хуейщ. И адэр дзюдомкIэ спортым и мастерым и кандидатщи, спортым дрегъэхьэх, и Iэпкълъэпкъым зрегъэужь. Далия и дэлъхум сыт ­щыгъуи и телъхьэщ, спортым щиIэ ехъу­лIэныгъэхэм щогуфIыкI.
Илъэсих и пэкIэ къэунэхуа Бакъейхэ я унагъуэ дахэр зэщхьэгъусэхэм фIыуэ ялъагъу я лэжьыгъэм нэхъри егъэбыдэ. Унагъуэм, лъагъуныгъэм, зэхуэпэжыным и махуэшхуэ куэд нобэ хуэдэу насыпыфIэу зэдагъэлъэпIэну ди гуа­пэщ!

БЖЬЫХЬЭЛI  Розэ.