Юч кюнню ичинде Нальчикде саулукъларында чекленнген онглары болгъанланы «Абилимпикс-2019» регионал ючюнчю чемпионаты бардырылгъанды. Анга юч къауумдан жетмиш адам къатышханды – школчула, студентле, специалистле. Ала онтёрт ызда эришгендиле. Ишлерине багъаны уа даражалы экспертле, ол санда иш бериучюле-чемпионатны партнёрлары да болгъандыла.
Былтыргъы чемпионатдача, быйыл да Элбрусну регионал колледжни окъуучулары ахшы кёрюмдюле кёргюзтгендиле. «Дюгер хычинлени бишириу» ызда Чеккеланы Разият хорлагъанды. Аны производстволу юйретиу жаны бла уста Отарланы Сакинат хазырлагъанды. «Тигиучю» ызда Жабелланы Альбина экинчи жерге чыкъгъанды (аны Хочуланы Захида юйретеди).
Чемпионатны чеклеринде анга къатышханла бла къонакъла иш эмда профориентация кёрмючледе болгъандыла, «тёгерек столлагъа», мастер-класслагъа къатышхандыла. Къабарты-Малкъар гуманитар-техника колледжде проектни жабылыуунда КъМР-ни жарыкъландырыу, илму эм жаш тёлюню ишлери жаны бла министри Ауес Кумыков кесини сёзюнде, эсеплеге да къарамагъанлай, хар къатышхан инсанны жетишимлилигин белгилегенди.