Бюгюнлюкде быйыл школланы бошагъан сабийле Бир къырал экзаменлерин да берип бошап, энди бийик окъуу юйлеге кире тургъан заманды. Бу кюнледе Къабарты-Малкъар къырал университетни ректоруну къуллугъун толтургъан Юрий Альтудов вузну абитуриенткасы, тарыхдан сынауда жюз баллгъа тийишли болгъан Залина Хагабанова бла тюбешгенди.

Юрий Камбулатович къызчыкъны школну жетишимли бошагъаны бла алгъышлагъанды эмда окъуугъа кире туруп, келир заманда жашауда бютюн сурам боллукъ усталыкълагъа эс бурургъа эмда кесини сайлауун анга кёре тохташдырыргъа чакъыргъанды.

-Бизге бюгюнлюкде хунерли жаш адамла бек керекдиле, ала азлыкъ окъуна этип турадыла. Жыл сайын да университетибизге жюз балла алгъанланы ючден бири келе болур дерчады. Бизде усталыкълагъа хазырлауну ызлары кёпдюле. Билим бериуден, илму бла кюрешиуден сора да, бизни студентлерибизге чыгъармачылыкъ иш бла, социал жумушла бла да тири кюреширча онгла бардыла. Сен да университетибизни  студенти болсанг, бизни КъМКъУ атлы уллу юйюрюбюзге къошулсанг, бек  ыразы боллукъбуз эмда кёлленирикбиз,-дегенди.

Ызы бла окъуу юйню башчысы Залина кесибизни университетибизде билим алыргъа нек итиннгенин билирге сюйгенди.

-Алгъадан да мен жаланда Къабарты-Малкъар къырал  университетге кирирге сюйгенме. КъМКъУ-да бу жол биринчи кере тюйюлме.  Окъуу юй кеси къурагъан эмда бардыргъан эришиулеге бла олимпиадалагъа къатышханлай тургъанма. Алай бла быйыл вузну обществознаниядан онбиринчи ачыкъ Шимал-Кавказ олимпиадасында (школчулагъа бла студентлеге) хорламгъа тийишли болгъанма. Андан ары да айный барырча онгла кесибизни университетибизде барлыкъларына ышанама,-дегенди Залина.

Эсгерте кетейик, Залина Хагабанова юч дерсден да берген Бир къырал экзаменлеринден битеулю эсепде 286 балл алгъанды. Ол а бек иги жетишимди. Тарыхдан жюз баллгъа тийишли болгъан къызчыкъ КъМКъУ-гъа кирирге эмда мында юристлени хазырлагъан ызда окъургъа мурат этеди. Кеси да Нартан элни биринчи номерли битеулю билим берген мектебин бошагъанды.

Мокъаланы Зухура.