Бадзэуэгъуэм и пэщIэдзэм  ди къэралым щагъэлъапIэ махуэшхуэр зыхуэмыгъэза цIыху щымыIэми ярейщ. Зи гугъу сщIыр   илъэс  15-м щIигъуауэ Урысей Федерацэм  щагъэлъапIэ    Унагъуэм,  лъагъуныгъэм, зэхуэпэжыным я   махуэращ.   «Унагъуэр быдэмэ, къэралыр лъэщщ», - жыIэгъуэ пэжым къегъэлъагъуэ ар  къэралым и зы Iыхьэу, жылагъуэм и быдапIэу зэрыщытыр.  

 Зи щхьэ пщIэ хуэзыщIыж дэтхэнэ къэралми хуэдэу, ди хэкуми гулъытэ ин щагъуэт унагъуэм, анагъэм, сабиигъуэм ехьэлIа Iуэхугъуэ псоми. А унэтIыныгъэм зиужь зэпыту йокIуэкI.

  Унагъуэм,  лъагъуныгъэм, зэхуэпэжыным я   махуэр гъэлъэпIэным  къриубыдэу ди Къэбэрдей-Балъкъэрми гулъытэ хэха щыхуащI бын куэд щапI унагъуэ зэгурыIуэхэм, зыпэрыт IэнатIэхэм ехъулIэныгъэхэр щызиIэ зэщхьэгъусэхэм, щIэблэм щапхъэ яхуэхъу нэхъыжьыфI зэрысхэм. Зи пщIэр лъагэ унагъуэ зэрыIыгъхэм гупсэхуу щадолажьэ Бахъсэн щIыналъэми. Къалэ  администрацэм и   и унэм   щекIуэкIа зэхыхьэ гуапэм дыгъуасэ щызэхаша гуфIэгъуэ зэIущIэм щаIэтащ щIыпIэм и унагъуэфIхэм ящыщ зыбжанэ.  Апхуэдэхэт, къапщтэмэ, КIуэкIуэхэ Мухьэмэдрэ Людмилэрэ, Бэрбэчхэ Анзоррэ Жаннэрэ, КхъуэIуфэхэ Къазбэчрэ Мадинэрэ, Калининхэ Сергейрэ Людмилэрэ я унагъуэ дахэхэр.  Махуэшхуэр гъэлъэпIэнымкIэ къэралпсо комитетым къыбгъэдэкI «Лъагъуныгъэмрэ зэхуэпэжыныгъэмрэ» медалыр  хуагъэфэщащ а унагъуэ зэгурыIуэхэм.    

Зэхуэсым апхуэдэу щагъэлъэпIащ «Унагъуэ-2023» урысейпсо зэпеуэм и щIыналъэ Iыхьэм пашэ щыхъуахэм ящыщ, «Унагъуэр лъэпкъ хабзэхэм я хъумакIуэщ» унэтIыныгъэм къыщыхэжаныкIа Бейхэ Iумэтрэ Каринэрэ я унагъуэ дахэр.

- Гухэхъуэщ  зэгурыIуэрэ зэдэIуэжрэ, хабзэрэ нэмысрэ щызекIуэ,  зи  жьэгу мафIэ хуабэр  мыужьых унагъуэ дахэхэм уаIуплъэныр, - жиIащ къызэхуэсахэм защыхуигъазэм къалэ администрацэм и Iэтащхьэ Мамхэгъ Хьэчим. – Фэ фщыщ дэтхэнэми фыщIэшхуэ вбгъэдэлъщ лъэпкъ хабзэм  и фIыпIэхэр  хъумэнымкIэ, щIэблэми щапхъэ фахуохъу фи зэхуаку дэлъ  пщIэшхуэрэ нэмыс къабзэмкIэ. Сигуми си псэми къабгъэдэкIыу сынывохъуэхъу Унагъуэм, лъагъуныгъэмрэ зэхуэпэжыныгъэмрэ я  махуэшхуэмкIэ.   Фызиплъыр  жьэгур уардэ унэу, фи Iэнэгум берычэтыр щытепщэу, хьэщIэ етIысэхыпIэрэ унапIэ махуэу,  фызэкъуэту, гъащIэм гу щыфхуэрэ абы  и IэфIыгъэ псори зыхэфщIэу, фи быным, абыхэм къащIэхъуэ фи щIэблэм я насыпым, ехъулIэныгъэхэм  фригушхуэу куэдрэ     фыпсэуну ди гуапэщ.

А псалъэ дахэхэм къакIэлъыкIуэу щIыпIэ Iэтащхьэм удзэ гъэгъа  Iэрамэ дахэхэр тыгъэ яхуищIащ  зэхуэсым кърихьэлIа унэгуащэхэм.

Зи цIэр фIыкIэ Iуа унагъуэ екIухэм, дахагъэмрэ гуапагъэмрэ зи Iэпэгъуу  къызэдогъуэгурыкIуэхэм, дэри ди гуапэу захудогъазэ: «Фи пщIэр лъагэрэ фи псэр къабзэу,  фи цIыхугъэ инымрэ нэмыс лъагэмрэ  къакIэрымыхуу гъащIэшхуэ къэвгъэщIэну, фи псэр зыщIэхъуэпс, насыпу къилъытэ псомкIи Тхьэр къыфхуэупсэну ди гуапэщ фэри фи унагъуэхэм ис дэтхэнэми».

ЖЫЛАСЭ Маритэ.