КъБР-м и Iэтащхьэ КIуэкIуэ Казбек Прави­тельст­вэмрэ муниципальнэ IуэхущIапIэхэм я уна­фэщIхэмрэ зэIущIэ ядригъэкIуэкIащ. Зэ­хуэсым щытепсэлъыхьащ Къэбэрдей-­Балъ­къэрым и жылагъуэ-экономикэ зыу­жьы­ныгъэмрэ илъэсым и кIэм абы и щытыкIэнумрэ.
 
Зэрыщыту къапщтэмэ, илъэсыр зэ­рыщIидзэрэ зэтраубла Iуэху псори йофIакIуэ. Правительст­вэм и УнафэщI Мусуков Алий къы­щыпсалъэм къыхигъэщащ промышленнэ зыу­жьыныгъэм и индексыр 2023 гъэм и щIышылэ-накъыгъэ мазэхэм я зэхуакум проценти 108, 6-кIэ зэрыхэхъуар. Хэхъуэ къагъэлъагъуэ щIым хъугъуэфIыгъуэ къыщIэзыххэм, абыхэм елэжь IуэхущIапIэхэм, гъэсыныпхъэм, псы къыщIэшыным пыщIахэм. УнэщIэу ятми я куэдагъыр процент 11,5-кIэ хэхъуащ. Илъэс блэкIам щыIа гъавэм еп­лъытмэ, мэкъумэш хозяйствэм кърихьэлIахэм я бжыгъэри проценти 4,6-кIэ нэхъыбэщ. ЛэжьапIэншэхэм я бжыгъэр тIукIэ нэхъ мащIэ хъуащ. ЦIыхухэм я хэхъуэр илъэс блэкIам ейм еплъытмэ,  сом мелард 31, 6-кIэ нэхъыбэ хъуащ. 
 Къэрал программэхэм хухахащ сом мелард 59-рэ. Абыхэм ящыщу процент 70-р жылагъуэм лъагъэIэсынущ: узыншагъэм, егъэджэныгъэм, къинэмыщI лъэныкъуэхэм. Лъэпкъ проектхэм япкъ иткIэ IуэхущIапIэ 270-рэ зэрагъэпэщыж. Абыхэм ятекIуэдэну хагъэкIащ 2023 гъэм къриубыдэу сом мелард 11,4-рэ, сом меларди 9-р – къэрал бюджетым щыщу. Лъэпкъ проектхэм я гъэзэщIэкIэмкIэ иужьрей мазихым тещIыхьауэ, республикэм къэралым 2-нэ увыпIэ, КИФЩI-м – япэ увыпIэр щиIыгъщ. 
Республикэм и Iэтащхьэм къыхигъэщащ ирагъэкIуэкI лэжьыгъэр зэрыабрагъуэр. Iуэхур зэтеухуэнри, Iэмэпсымэхэр къешэлIэнри, лэжьа­кIуэхэр къэгъуэтынри, ухуэныгъэ хуэIухуэщIэхэмкIэ къызэбгъэпэщынри, а псом кIэлъыплъынри, ягъэува пIалъэм къыкIэрымыхунри абы щыщщ. Зи гугъу ящIа IуэхущIапIэхэр зыхуей хуэзэн папщIэ, ахъшэ къагъуэтыну унафэ яхуищIащ республикэм и Iэтащхьэм. Гъэр имыух щIыкIэ, школибл, зы спорткомплекс, Налшык дэт поликлиникэр, Кубарэ Октябрьскэмрэ дэт амбулато­рэхэр, Эльбрус дэт сымаджэщыр, Аушыджэр дэт ЩэнхабзэмкIэ унэр, псэупIэ-коммунальнэ хозяйствэм хиубыдэ IуэхущIапIэ зыбжанэ нагъэсыну къалэн зыхуащIыжащ.