Къэбэрдей-Балъкъэрым и автомобиль зекIуапIэхэр иджырей мардэхэм къитIасэу зэрызэрагъэпэщыж щIыкIэр къэзыпщытэ комиссэм и лэжьыгъэр мы махуэхэм щIэгъэхуэбжьауэ йокIуэкI.
Гъуэгуухуэхэм къызыхуэтыншэу зыхуей хуагъэзащ Аруан районым и жылащхьэ Нарткъалэ Ахъмэтым и цIэкIэ щыIэ уэрамым и машинэ зекIуапIэу километрым нэблагъэ зи кIыхьагъыр. Ар зэрагъэпэщыжащ «ГъуэгуфI шынагъуэншэхэр» лъэпкъ проектым ипкъ иткIэ.
IэщIагъэлIхэм гъуэгум зи гугъу тщIы и Iыхьэм телъа асфальт-бетон «уэншэкужьыр» трагъэкъэбзыкIри асфальтыщIэ тIуащIэ «трабзащ», уэрамым и лъэс зекIуапIэхэр къагъэщIэрэщIэжащ, зэпрыкIыпIэхэр къызыхуэтыншэу щаубзыхуащ, дэщIыгъупхъэ нагъыщэхэр здэщыIапхъэм и кIыхьагъкIэ щыхагъэнэхукIащ, гъуэгунапщIэ Iуфэр мывэ гъэжахэмкIэ Iуагъэбыдыхьащ.
Комиссэм хэтхэм къапщытащ гъуэгуухуэхэм мыбдежым щрагъэкIуэкIа лэжьыгъэр фIагъ и лъэныкъуэкIэ зыхуэдэр: автомобиль зекIуапIэм и бгъуагъымрэ ищхъэрэ-ипщэ теухуауэ джабэ нэкIу щIыкIэу зэрызэхуагъэкIуар, гъуэгум тралъхьа асфальт-бетоныр ГОСТ-м щыгъэува мардэм зэрытехуэр, нэгъуэщIхэри.
Нарткъалэ администрацэм и унафэщI Бейтыгъуэн Арсен гъуэгуухуэхэм фIыщIэ яхуищIащ ирагъэкIуэкIа лэжьыгъэм папщIэ: «Мыбдежыр, автомашинэ нэхъыбэ дыдэ щызекIуэу, Нарткъалэ и уэрам нэхъ зызыубгъуахэм ящыщ зыт, зэгъэпэщыжын зэрыхуейри куэд щIат».
IэщIагъэлIхэм зыхуагъэувыжа пIалъэм ипэ иту лэжьыгъэ псори зэрызэфIагъэкIари къыхэгъэщыпхъэщ.
АЗЫЧЭ Бэллэ.