КъБР-м и УнафэщIым 2023 гъэм накъыгъэм и 4-м къыдигъэкIа унафэ №48-УГ-м ипкъ иткIэ, КъБР-м и Парламентым и УнафэщI Егоровэ Татьянэ иригъэкIуэкIащ хабзэубзыху IэнатIэр илъэс 30 зэрырикъур щагъэлъэпIэну дауэдапщэхэм я КъызэгъэпэщакIуэ комитетым и япэ зэIущIэр.
ЗэIущIэр къыщызэIуихым, Егоровэ Татьянэ жиIащ:
- Парламентыр къыщызэрагъэпэща махуэр Къэбэрдей-Балъкъэрым дежкIэ мыхьэнэшхуэ зиIэщ. Япэ дыдэу 1993 гъэм хаха хабзэуху IуэхущIапIэм республикэм мамырыгъэрэ зэгурыIуэрэ къыщызэтенэным хэлъхьэныгъэшхуэ хуищIащ, абы щыпсэу лъэпкъхэм я зэхуаку щытепщэ зэныбжьэгъугъэр ихъумащ. БлэкIа илъэсхэр ипэжыпIэкIэ цIыхубэм я унафэм къару щигъуэта лъэхъэнэу пхужыIэнущ. А зэманым къриубыдэу, депутатхэм лэжьыгъэшхуэ ирагъэкIуэкIащ республикэм къыщаIэт дэтхэнэ зы Iуэхуми хабзэкIэ тегъэщIапIэ иIэн папщIэ, абы и фIыгъэкIэ щIыналъэм и жылагъуэ-экономикэ зыужьыныгъэр ефIэкIуащ. А Iуэхум къэрал унафэщIхэми гу лъатащ.
Арэзы утехъуапхъэщ зи гугъу тщIы илъэсхэм «парламентаризм» жыхуаIэ Iуэху зехьэкIэр зэрызэфIэувам. Абы къыхэкIыу, нобэ щыщIэдзауэ республикэ гъащIэм и зы Iыхьэу щыт а махуэшхуэр зэрагъэлъэпIэнур наIуэу щрет.
КъБР-м и Правительствэм и унафэщI Мусуков Алий къыхигъэщащ къапэщылъ махуэшхуэм епха дауэдапщэм щIыналъэхэми къалэхэми я щIыпIэ администрацэхэр жыджэру зэрыхэлэжьыхьыпхъэр.
КъызэгъэпэщакIуэ комитетым хэтхэм махуэшхуэр зэрагъэлъэпIэну щIыкIэр яубзыхуащ. Абы теухуауэ къэпсэлъащ хабзэубзыху IуэхущIапIэм и УнафэщIым и къуэдзэ Жанатаев Сэлим. КъызэгъэпэщакIуэ комитетым хэтхэм къызэрыхалъхьэм елъытауэщ махуэшхуэм и екIуэкIыкIэм и планыр зэрызэхалъхьар. ГуфIэгъуэ пшыхьым и ужькIэ екIуэкIынущ спорт зэпеуэхэр, зэхьэзэхуэ зэмылIэужьыгъуэхэр, зэIущIэхэр, гъэлъэгъуэныгъэхэр. КъБР-м и Парламентым сабийхэмрэ студентхэмрэ яшэу зыщрагъэплъыхьынуи я гугъэщ. Махуэшхуэм ирагъэхьэлIэнущ стIол хъурейхэр, дерс зэIухахэр, ныбжьыщIэхэм я паспортхэр иратыжынущ, Шэджэм муниципальнэ щIыналъэм хыхьэ лъагапIэ гуэрым альпинистхэр дэкIуеинущ, цIыху куэд зыхиубыдэ щэнхабзэмкIэ дауэдапщэхэри ирагъэкIуэкIынущ.
Жэрдэм ящIащ КъБР-м и Парламентыр илъэс 30 зэрырикъум теухуауэ тхылъ къыдагъэкIыну, республикэм и СМИ-хэм рубрикэ щхьэхуэхэр къыщызэIуахыну, фильмхэмрэ нэтынхэмрэ ягъэхьэзырыну.
- ТлъэкI къэдгъанэ хъунукъым махуэ лъапIэр екIурэ ещхьу едгъэкIуэкIын папщIэ, - жиIащ Егоровэ Татьянэ.
КъБР-м и Парламентым и пресс-IуэхущIапIэ.
