КъБР-м и Парламентым и щIыхь тхылъхэр иратащ республикэм и дежкIэ мыхьэнэ зиIэ Iуэху дахэхэр зылэжьхэм, зи IэщIагъэкIэ зэфIэкI къэзыгъэлъэгъуахэм.
Кърагъэблэгъахэм гуапэу захуигъэзащ Парламентым и УнафэщI Егоровэ Татьянэ:
- Зыпэрыт IэнатIэм ехъулIэныгъэфIхэр къыщызыгъэлъагъуэхэм гулъытэрэ пщIэрэ зэрахуэтщIым и щыхьэтщ нобэрей зэIущIэр. Парламентым къедгъэблэгъахэм жэуаплыныгъэ яхэлъщ, щэнхабзэмрэ хабзэмрэ ялъытэ, зыпэрыт IэнатIэм хуэпэжщ. Куэд фхузэфIэкIащ республикэм, къэралым папщIэ. Щхьэхуэу къыхэзгъэщыну сыхуейщ гу къабзэкIэ псапэ зыщIэ, цIыхухэм сэбэп яхуэхъу волонтёрхэм я лэжьыгъэр. Псом хуэмыдэу и мыхьэнэр инщ мы зэманхэм екIуэкI дзэ Iуэхухэм хэт ди цIыхухэм ядэIэпыкъунымкIэ абыхэм «Дызэгъусэщ» урысейпсо Iуэхум хэту къызэрагъэпэщхэм. Апхуэдэхэм деж нэхъри зыхыбощIэ дэтхэнэми къэкIуэнум папщIэ ихь жэуапыр зэрыиныр. УзэрыIыгърэ узэкъуэтмэщ къару щыбгъуэтыр.
Нобэ дгъэлъэпIэну къедгъэблэгъахэм фиIэщ Iуэху бгъэдыхьэкIэ зырыз. Ауэ фэ зэщхь фещI лэжьыгъэм и пIалъэр зэрыфIщIэм, фызэрымыщхьэхым, мурадхэм фазэрылъэIэсым, лъагапIэщIэхэм фазэрыхуэпабгъэм, гъащIэм фIы и лъэныкъуэкIэ зевгъэхъуэжыну фызэрыхуейм. Сэ абы папщIэ фIыщIэ фхузощI, узыншагъэ, мамырыгъэ, гуапагъэ фиIэну сынывохъуэхъу.
Парламентым и УнафэщIым кърагъэблэгъахэм яритыжащ щIыхь тхылъхэмрэ фIыщIэ тхылъхэмрэ. Я цIэр ираIуащ егъэджэныгъэм, цIыхухэм я хуитыныгъэр хъумэным, псэукIэр егъэфIэкIуэным, физическэ щэнхабзэмрэ спортымрэ, щэнхабзэм, журналистикэм, экономикэм, щIым елэжьыным, узыншагъэр хъумэным, псапэ щIэным теухуауэ зэфIэкI зыгъэлъэгъуахэм.
ГУГЪУЭТ Заремэ.