Мы гъэм илъэс 315-рэ ирокъу Къэнжал зауэм къэбэрдейхэм текIуэныгъэр къызэрыщахьрэ. 1708 гъэм мини 10 фIэкIа мыхъу адыгэдзэм мин 60 - 70-м хуэдиз кърымыдзэм кIэ иратауэ щытащ. Дауи, а Iуэхугъуэр икъукIэ гъэщIэгъуэнщ икIи а лъэхъэнэм Къэбэрдеймрэ Кърымымрэ яку дэлъа зэбииныгъэмрэ зауэмрэ нэхъ нэIуасэ захуэтщIын папщIэ зыхуэдгъэзащ тхыдэ щIэныгъэхэмкIэ доктор, профессор, Къэбэрдей-Балъкъэрым Гуманитар къэхутэныгъэхэмкIэ и институтым и лэжьакIуэ Къущхьэбий Анзор.
- КъызэрыслъытэмкIэ, Къэнжал зауэм и пэжыпIэм щымыгъуазэ куэд къытхэтщ. Абы пэщIэдзэ хуэхъуам укъытхутепсэлъыхьмэ, куэдым хьэлэмэт ящыхъуну къыщIэкIынщ.
- Къэнжал зауэм Къэбэрдей - Кърым зауэкIи йоджэ. Ар щекIуэкIар 1707 - 1708 гъэхэращ. А лъэхъэнэм къэралыгъуэ зэмылIэужьыгъуэхэм хуабжьу зэгурымыIуэныгъэшхуэхэр яку дэлът, я зэхущытыкIэхэр зэIыхьат - европей къэралышхуэхэр (империе) зэныкъуэкъурт адрей нэхъ цIыкIухэр зэзылъэфэлIэнымкIэ. КъуэкIыпIэмкIэ Уэсмэн империемрэ Иранымрэ зэхуэдзэлашхэрт азие къэралхэр зэпаубыдауэ. Дауи, КавказымкIи къаплъэрт ахэр икIи ар зылъысыным теухуауэ Европэмрэ КъухьэпIэмрэ зэпэщIэтырт. Къапщтэмэ, Ираным дагъыстэн лъэпкъхэр иубыдыну иужь ихьауэ щытащ. Уэсмэн империер хущIэкъурт КIахэмрэ Къэбэрдеймрэ зыIэригъэхьэну, и унафэм щIигъэувэну. А зэманым Къэбэрдейри КIахэри къэрал щхьэхуиту щытащ.
1707 гъэм гъатхэм кърым хъаныгъуэм Къаплъэн-Джэрий къытеуващ. Езы кърым хъанхэм хабзэу ягъэувауэ щытащ, хъаныщIэ щытеувэм деж, къэрал гъунэгъухэм тын къытрахыу. Апхуэдэу, Кърымым къикIыу Къэбэрдейм къэкIуащ калга Менгли-Джэрий, зауэлI гупышхуэ щIыгъуу. КъыщIагъэкIуар - тын папщIэу Къэбэрдейм хъыджэбзрэ щIалэу мини 3-м нэс къыIрахыну арат. Кърымым къикIа зауэлIхэм цIыхухэм зытрагъэхьэлъэрт, гущыкIыгъуэу защIырт, жылэхэр яхъунщIэрт. А лъэхъэнэм Къэбэрдейм и пщышхуэу щыта ХьэтIохъущокъуэ Кургъуокъуэ хасэ зэхишэри, абы унафэ щащIащ кърым зауэлIхэр зэтраукIэну икIи зы жэщым къриубыдэу бийм кIэ къыхуагъэкIуащ. Ауэ, гъэщIэгъуэнракъэ, езы Менгли-Джэрий ямыукIыу яутIыпщыжащ.
- Ар сытым къыхэкIыу?
- ГурыIуэгъуэщ - къащыщIар и лъэпкъэгъухэм ялъигъэIэсыжын папщIэ. Шэч хэмылъу, кърым хъаныр хъийм икIат икIи Истамбыл лIыкIуэ игъэкIуащ Тырку сулътIан Ахьмэд III-м иригъэлъэIуну, Къэбэрдейм дзэ игъакIуэу зэтригъэукIэну хуит къищIыну (абы щыгъуэ кърым хъаныгъуэр Уэсмэн империем хыхьэу щытащ). СулътIаным унафэ имыщIауэ Къаплъэн-Джэрий хуиттэкъым зыми зауэ ирищIылIэну. Арати, Ахьмэд III-р абы арэзы техъуащ икIи и щыхьэту кърым хъаным къыхуригъэхьыжащ сэшхуэрэ щыгъын лъапIэхэмрэ. СулътIаным и унафэмкIэ, тэтэрхэмрэ нэгъуейхэмрэ зы защIыу Къэбэрдейр яубыдыну арат.
Тхылъхэм, документхэм къазэрыхэщыжымкIэ, кърым хъаным илъэскIэ зигъэхьэзыращ икIи дзэшхуэ зэхуишэсащ. КъызэралъытэмкIэ, а дзэр зауэлI мин 60 - 70 хъурт. Абы хэтт езы кърым-тэтэрхэри, Бисарабиемрэ Псыжь Iуфэм Iус нэгъуейхэри, Каффэ быдапIэм дэт тырку горнизонри. Псори шуудзэт, абы нэмыщI артиллерие яIэт - топ 24-рэ. Дзэр накъыгъэ мазэм къежьащ - апхуэдиз гъуэгуанэ зэпачынум шыхэр шхын щхьэкIэ лIэнути, удзым зиIэтыху пэплъауэ арат. ЗэратхыжымкIэ, къыщысар гуэдзыр щыхъу зэманрат. Нэхъ тэмэму жыпIэмэ, бадзэуэгъуэ мазэращ.
Къэбэрдейм ар щызэхахам, загъэхьэзыру щIадзащ - ХьэтIохъущокъуэ Кургъуокъуэ цIыхухъу псори къызэфIигъэуват, ауэ зауэм Iухьэнур уэркъхэрат.
- Къэбэрдейхэм я закъуэ апхуэдиз цIыхум пэщIэувэнурат? ДэIэпыкъуэгъу яIакъэ?
- Пщышхуэр дамэгъу лъыхъуэу Къалмыкъ хъаным деж лIыкIуэ игъэкIуауэ щытащ, фыкъыддэIэпыкъу, жиIэри. Ауэ, Пётр I-м и унафэ сиIэкъым, жиIэри, къэбэрдейхэм къыддэIэпыкъун идакъым. Щыхуейм деж урыс пащтыхьым и унафэм щIэупщIэртэкъым ахэр, кърым хъаным щышынауэ арат. Апхуэдэу, дон, тэрч къэзакъхэми елъэIуахэт. Абыхэми зыкъытщIагъэкъуакъым. Тэтэрыдзэр къэмыс щIыкIэ къуажэм дэсхэр псори дашри, бгыхэм щагъэпщкIуауэ щытащ. Жагъуэгъур къыщысам, занщIэу зауэр ямыублэу, зралъэфыхьу щIадзащ, тыныр къэбэрдейхэм мамырыгъэкIэ къызэрыIэщIагъэкIыным хэту. Адыгэхэм Хасэ зэхашати, псоми зы жьэу жаIаращ: «Зыри еттынукъым икIи депсэлъэнукъым, унафи зыхуедгъэщIыххэнукъым. Дызэуэнущ!»
Тхыдэм къызэрыхэщымкIэ, мазэрэ ныкъуэкIэ, зы жэщ къэмынэу, къэбэрдейхэр кърымыдзэм теуэурэ, зэтраукIэу щIадзащ. ГъэщIэгъуэнракъэ, зэ закъуэ махуэу ятеуакъым. Къэбэрдейхэр бзаджагъэм хуэкIуауэ арат.
- Къэнжал зауэ фIэщыгъэр щхьэ игъуэтат абы?
- Иныкъуэхэм зэрыжаIэмкIэ, кърымхэр икIуэтурэ Къэнжал щIыпIэм нэсат. Ауэ дэ дызэригугъэмкIэ, езы адыгэхэр хуейуэ бийр а лъагапIэм драхуеяуэ арат. Я топхэр кърырагъэлъэфэкIыну кърымхэм махъшэхэр къыздашат икIи я Iэщэхэр псори Къэнжал лъагапIэм здрашеят, ауэ сэбэп яхуэхъуакъым. 1708 гъэм фокIадэ мазэм «жэщтеуэ зауэр» яублащ къэбэрдей шуудзэхэм. Къэнжалым узэрыдэкIуей гъуэгур икъукIэ кIыхьщ икIи бгъузэ нашэкъашэщ. Жэщтеуэм къела кърымыдзэр абы къыщехыжым дзэм и нэхъыбэри зэтраукIэжащ.
Къыхэзгъэщыну сыхуейт иджыри зы Iуэхугъуэ - шыдхэм мафIэ щIагъанэурэ, кърымыдзэм хаутIыпщхьат, псэущхьэ лажьэ зимыIэхэр къагъэсэбэпащ, жаIэ зыгуэрхэм. Ар щыуагъэщ икIи делагъэ дыдэщ жыпIэну. Зы тхыгъи щыIэкъым щыхьэт техъуэу. ЗауэлIхэм абы теухуауэ жаIэнур къэтщIэн папщIэ, Афганистаным, Абхъазым щызэуа щIалэхэр здэтшэри дыкIуат Къэнжалым. Абыхэм зэрыжаIамкIэ, Iэмалкъым шыдхэр Iуащхьэ нэс дэплъэфеину, укъызэралъагъуным къищынэмыщIыжа, мыхьэнэ лъэпкъ иIэкъым, апхуэдиз къару тебгъэкIуадэу, псэущхьэ ерыщым мафIэ лыгъейр къыпихыу кърымыдзэм хэбутIыпщхьэным. Уегупсысми, апхуэдизу зауэ куэдым хэлIыфIыхьа зауэлI IэкIуэлъакIуэхэр шыдкIэ пхуэгъэшынэну?!
НэгъуэщI зы лъэпкъи къыхэмыIэбэу, Къэбэрдейм и закъуэ къихьа текIуэныгъэщ ар. Тхылъхэми IупщIэу къыхощ - «Зы цIыху фыкъыддэIэпыкъуакъым, ауэ кърымхэм датекIуащ» жиIэу иту, Урысейм тхыгъэ ирагъэхьауэ щытащ адыгэхэм. Къэбэрдеипщхэм я зэныкъуэкъуныр щагъэтщ, зэкъуэувэри, бийм ятекIуауэ аращ. Зауэм и кIэм кърымыдзэм къыхэнэжар цIыху мини 5-т. ЗауэлI нэхъыфI дыдэхэм къыхащыпыкIауэ зы минрэ ныкъуэм хуэдиз хъууэ къежьа Сеймен дзэм щыщу къэнэжар цIыху 17-т. Ари къелауэ аратэкъым, атIэ езы къэбэрдейхэм яутIыпщыжауэ арат.
- Сыт хуэдэ гупсысэм къыхэкIыу яутIыпщыжат ахэри?
- Къэбэрдейхэр мыбдеж аргуэру бзаджагъэм хуэкIуащ - Къаплъэн-Джэрий яукIатэмэ, Уэсмэн империем ар щихъ хъуауэ къалъытэнут икIи абы илъ ящIэжыну иджыри дзэ къагъэкIуэнут Къэбэрдейм. А зэманым адыгэхэм муслъымэныгъэр къэзыщтауэ хэтыр мащIэ дыдэт (пщыхэмрэ уэркъхэмрэт). Шэрихьэтым зэрыжиIэмкIи, муслъымэнхэм «Тын къызэфт!» жыпIэу пэбубыд хъунутэкъым, ауэ къэбэрдейхэр муслъымэну къалъытэртэкъым абыхэм.
- Анзор, Къэнжал зауэм и мыхьэнэуэ къалъытэр сыт? Сыт абы адыгэм и тхыдэм увыпIэшхуэ щIыщиубыдар?
- Япэрауэ, Къэбэрдейр кърымыдзэ шынагъуэм къелыфащ. Иджыри зэ къытезгъэзэжынщи, къэбэрдейхэр мини 10 къудей хъууэ арат, кърымхэр мин 60 - 70 хъурт. ЕтIуанэрауэ, къэбэрдейхэм адрей адыгэ лъэпкъхэри кърагъэлауэ щытащ. Абыхэм кърымыдзэр зэтрамыукIатэмэ, ди щIыналъэри, адрей лъэпкъхэри зэщIаубыдэнут. Ещанэрауэ, а зэманым дуней псом къыщекIуэкIа Iуэхугъуэхэр къапщтэу щытмэ, абы щыгъуэ Урысеймрэ Швециемрэ гуащIэу зэзауэу щытащ. Швед пащтыхь Карл XII-мрэ тырку сулътIанымрэ зэгурыIуат кърым хъаным и дзэр къежьэу шведхэм къадэIэпыкъуну. Ауэ, зэрытщIэщи, кърымыдзэм и нэхъыбэр Къэбэрдейм щызэтраукIауэ щытащ икIи шведхэм дагъэIэпыкъужын яIэжакъым. Апхуэдэу, кърымыдзэр къэмысурэ Пётр I-м и дзэр шведхэм текIуауэ щытащ. Абы къыхэкIкIэ, Къэнжал зауэм дунейпсо мыхьэнэ егъуэт.
Епсэлъар ФЫРЭ Анфисэщ.