Федерал налог службаны Къабарты-Малкъарда бёлюмюню жамауат совети жыйылгъан эди бу кюнледе. Анда республикада бизнесни административ жаны бла къысыу къалай болгъаныны эмда ЕГРЮЛ-ге  терс информацияны жибериу неге келтирлигини юсюнден сёлешиннгенди, деп билдиргендиле бу ведомствону пресс-службасындан.

УФНС-ни башчысы Аслан Губачиков Жамауат советни келечилерин кеслерини оюмларын ачыкъ айтыргъа чакъыргъанды, ишни къыйматы анга кёре боллугъун чертгенди эмда къолларына удостоверенияларын тутдургъанды.

Биринчи теманы юсюнден Управленияны башчысыны орунбасары Байсолтанланы Расул сёлешгенди. Ол билдиргенича, РФ-ни Правительствосуну былтыр онунчу мартда 336 номерли бегими чыкъгъаны бла, Къабарты-Малкъарда налог органла контроль-касса техниканы хайырланыу жаны бла тинтиу бардырмагъандыла. Ведомствону ишини къыйматы уа рыноклада низамсызлыкъны къурутуу жаны бла проектни эсеплерине кёре тергеледи. Аны себепли УФНС налог тёлеучюлеге сагъынылгъан техниканы хайырланыргъа кереклисин айтып турады. Анга кёз-къаш бермеген жарым жюз инсаннга быйыл экинчи кварталда эсгертиуле этгенден сора, 36 адам низамгъа къайтхандыла.

Организацияланы бир къырал тизмесине (ЕГРЮЛ) терс информация жибергенлеге къаллай жууаплылыкъ болгъаныны юсюнден а УФНС-ни регистрация эм налог тёлеучюлени эсепге алыу бёлюмюню тамата инспектору Къулийланы Мусса хапарлагъанды. Ол билдиргенича, алай этгенле административ неда уголовный жууапха тартылыргъа, ЕГРЮЛ-ден кетерилирге, организацияларыны ишчи даражасын тас этерге боллукъдула. Дагъыда налог органла, банкла эм башхала бла байламлыкъларында чырмаула чыгъарыкъдыла. Ишеклик чыкъса неда сейирлери болгъанладан заявление келсе, ведомство ол тизмеде информацияны тюзлюгюн тинтип башлайды. Игиси – организация кесини юсюнден информацияны кезиу-кезиу тинтип турса. Ол къыйын жумуш тюйюлдю, ФНС-ни сайтында аны терк этер амал барды.

Жамауат советни башчысы Арсен Татуев жыйыла баргъан сорууланы сюзерча узакъгъа созмай энтта да бир кере тюбеширге чакъыргъанды. Аны орунбасары, «Россейни таянчагъы» жамауат организацияны Къабарты-Малкъарда бёлюмюню башчысы Альберт Кильчуков а, бир налог системаны (ЕНС) юсюнден Управление ыйыкъ сайын семинарла бардырып тургъанын Предпринимательствону кюнюне аталып Москвада бардырылгъан форумда окъуна сагъынып, ахшы юлгюге санагъанларын билдиргенди.

Улбашланы Мурат хазырлагъанды.