Тийишли программаны чеклеринде быйыл Къабарты-Малкъарда 160 километр чакълы жолла жангыртыллыкъдыла. Районланы барына да регионну жол фондундан къадар субсидия берилликди, дегендиле КъМР-ни Транспорт эмда жол мюлк министерствосунда.

Жол фонд деген а неди, ол къалай къуралады?

Ары ахча бюджетден бёлюнеди. Ол а отлукъгъа акцизледен, транспорт налогдан, жоллада жюрюуде жорукълагъа бузукълукъ этиу тазирледен, жоллагъа салыннган хата ючюн тёлеуледен, ауур жюкле ташыгъан транспортдан эмда къыралны бюджетинден жиберилген субсидияладан толады. Бу ахчагъа жолланы жангыртыу бла чекленип къалмай, алада къоркъуусузлукъну да жалчытадыла. Дагъыда чыракъла, буруула, светофорла, белгиле орнатыладыла, жаяу жюрюгенлеге жолчукъла жарашдырадыла.

Министерстводан эсгертедиле: бизни республикада транспорт налогну борч этип тургъанла битеу да 900 миллиондан аслам сом берирге керекдиле. Ол ахча жыйылса, жангыртылгъан жолланы саны бютюнда кёп боллукъду.

Омарланы Мурат хазырлагъанды