Дыгулыбгъуей къуажэм щыщ Бакъейхэ Анзоррэ Заринэрэ я щIалищым - Джэмал, Тембулэт, Имран - Iэпщэрыбанэм зыхуагъасэ икIи, я ныбжьми емылъытауэ, ехъулIэныгъэфIхэр щаIэщ.
Зэкъуэшхэр Бахъсэн къалэм и курыт еджапIэ №10-м щоджэ. Джэмал 9-нэ, Тембулэт 8-нэ, Имран 6-нэ классхэм макIуэ. ЩIалэхэм я адэ Анзор Iэпщэрыбанэ спортымкIэ зэфIэкI иIащ. Я анэ Зарини УФ-м спортымкIэ и мастерым и кандидатщ, тхэквондомкIэ бгырыпх фIыцIэр къыщыхуагъэфэщащ.
Я ехъулIэныгъэхэм щхьэхуэу я гугъу пщIымэ, Бакъей Джэмал (илъэс15) илъэсибгъу зэрыхъурэ Iэпщэрыбанэм зыхуегъасэ, УФ-м спортымкIэ и мастерым и кандидатщ. ЩIыналъэпсо, республикэпсо, урысейпсо зэпеуэхэм щытекIуащ. КъищынэмыщIауэ, Минскрэ Москварэ тIэунейрэ я чемпион хъуащ. Къэбэрдей-Балъкъэрымрэ Урысеймрэ (Москва къалэм) я Iэпщэрыбанэ гупхэм яхэтщ. УФ-м IэпщэрыбанэмкIэ и дыжьын саугъэтыр, чемпион бгырыпхищ, текIуэныгъэм и кубок 25-рэ, медаль 47-рэ къыхуагъэфэщащ.
Бакъей Тембулэти (илъэс 14) и къуэш нэхъыжьым и лъагъуэм ирикIуащ. Илъэсий зэрыхъурэ Iэпщэрыбанэм зыхуегъасэ, УФ-м спортымкIэ мастерым и кандидатщ. ЩIыналъэпсо, республикэпсо, урысейпсо зэпеуэхэм мызэ-мытIэу щытекIуащ. Ар Къэбэрдей-Балъкъэрым и Iэпщэрыбанэ гупым хэтщ. Чемпион бгырыпхиплI, кубок 24-рэ, медаль 44-рэ иIэщ.
Бакъей Имран (илъэс 12) илъэсибл зэрырикъурэ Iэпщэрыбанэм зыхуегъасэ, абыкIэ япэ разрядыр иIэщ. Ар и къуэш нэхъыжьитIым ядоплъей икIи абыхэм закъыкIэримыгъэхуным хущIокъу. Имран чемпион бгырыпхиплI, текIуэныгъэм и кубок 18, медаль 40 къратащ.
Зэкъуэшхэм спортымкIэ яIэ ехъулIэныгъэхэр зи фIыщIэр, дауи, я гъэсакIуэхэу Джэрыджэ Альберт, Пщыкъу Артур, Бэрэгъун Рустам, Къардэн Ашэмэз, Уэрдокъуэ Казбек сымэщ. ЗэфIэкI зиIэ щIалэхэм я ехъулIэныгъэхэр щапхъэщ. ДяпэкIи абыхэм я цIэр ди щIыналъэми хамэ къэралхэми фIыкIэ щыIуну, къызыхэкIа лъэпкъыр ягъэгушхуэну ди гуапэщ!
ТЕКIУЖЬ Заретэ.
