ХъыбарегъащIэ IэнатIэхэм я лэжьакIуэхэм къаIущIащ КъБР-м и дзэ комиссар Пахомов Дмитрийрэ зэрызэраухылIа щIыкIэм тету дзэм дашхэм я дэфтэрхэм щыхэплъэ IуэхущIапIэм и унафэщI Дмитриев Виталийрэ.
Комиссарыр щыхьэт зэрытехъуэмкIэ, дзэм зи дэшыгъуэу ираджэхэр къулыкъу щрахьэкIыну щIыпIэхэм пщIэ щIамыту нашэс, гъуэгум гъуэмылэкIэ къыщызэрагъэпэщ, здынэсам гъэмахуэ-щIымахуэ фащэхэмкIэ щахуапэ, махуэм щэ щагъашхэ.
Адрей илъэсхэми хуэдэу, мыгъэрей гъатхэ-гъэмахуэ Iуэхугъуэри мэлыжьыхьым и 1-м щыщIэдзауэ бадзэуэгъуэм и 15 пщIондэ йокIуэкI. Ди республикэм щыщу а щIыкIэм тету дзэм хашэхэм я бжыгъэр, къыхуагъэува мардэм тетщ.
Иджырей дэшыгъуэм хэхуахэр хьэуа-десантыдзэм, лъэсрыкIуэдзэм, кхъухьыдзэм (флот), лъэпкъ гвардием хагъэхьэ.
Курыт еджапIэр къэзыуххэм ящыщу зи ныбжьыр илъэс 18 хъуахэр жэпуэгъуэм и 1 пщIондэ армэм ираджэнукъым. ЕджапIэ нэхъыщхьэ е IэщIагъэ хэха щызрагъэгъуэт колледжхэм щIэтIысхьэхэр зэман пыухыкIакIэ (я еджэгъуэр яухыху) дзэм дашынукъым.
Мыри къыхэгъэщыпхъэщ. Илъэс пIалъэкIэ армэм дашынухэр зауэ IэнатIэм пэрагъэувэнукъым, езыхэм я фIэфIыныгъэ халъхьэу абы щыхуагъэхьэзыр дерсхэм пхамыгъэкIауэ. Апхуэдэхэри, зыхуагъэпсыну Iуэхум фIыуэ щыгъуазэ хуамыщIауэ, зэпэщIэувэныгъэ гуащIэ щекIуэкI щIыпIэхэм яшэнукъым.
ЗэрызэраухылIа щIыкIэм тету дзэм къулыкъу щезыхьэкIынухэм УФ-м ЗыхъумэжыныгъэмкIэ и министерствэм абы теухуа зэгурыIуэныгъэ иращIылIэ. Хабзэм тещIыхьа а дэфтэрым Iэ щIадзыну хуитщ зи дэкIыгъуэу армэм дашхэми, дзэм хэтауэ къыхэкIыжахэми, цIыхубзхэми, хамэ къэрал щыщхэми. Контракт зращIылIэхэр къыхах къэралым и федеральнэ хабзэ №53-мрэ УФ-м и Президентым дзэм къулыкъу щехьэкIынымкIэ 1999 гъэм фокIадэм и 16-м къыдигъэкIа Унафэ №1237-мрэ япкъ иткIэ. Дзэм хэшэн Iуэхур щIыналъэхэм зэрыщекIуэкIым кIэлъоплъ УФ-м ШынагъуэншагъэмкIэ и советым и унафэщIым и къуэдзэ Медведев Дмитрий.
Дзэм зэрызэраухылIа щIыкIэм тету къулыкъу зэрыщрахьэкIым хуэгъэзауэ журналистхэм щепсалъэм, Дмитриев Виталий къыхигъэщащ мэлыжьыхьым и 15-м къыщегъэжьауэ а Iуэхум телажьэу, Налшык къалэм Идар Темрыкъуэ и цIэр зезыхьэ и уэрамым и 198-нэ унэм хэту хэ-щIапIэ щхьэхуэ къызэрыщызэрагъэпэщар, республикэм щыщхэр екIуалIэ хъууэ. Нэхъапэхэм апхуэдэ здэщыIар Владикавказ и закъуэт.
Контрактым къыщыгъэлъэгъуа пIалъэр я нэхъ мащIэрауэ зы илъэсщ, нэгъуэщIу жытIэмэ, апхуэдизщ е абы нэхърэ нэхъыбэщ.
- ЗыхъумэжыныгъэмкIэ министерствэм езым и фIэфIыныгъэкIэ гурыIуэхэм зэ тыгъуэу сом мини 195-рэ къыIэрагъэхьэ, абыхэм ящыщу зауэ IэнатIэ пэрыувэхэм мазэ къэс сом мин 204-рэ ират. КъинэмыщIауэ, къэралым мыдрей и цIыхухэми хуэдэу, социальнэ IуэхукIэ къылъагъэсыпхъэ псори хуахъумэнущ. Зи гугъу тщIы щIыкIэм тету дзэм хыхьэхэм я ныбжьыр илъэс 60-м щIигъу хъунукъым, - къыхигъэщащ Дмитриевым.
Къэралыр зэрыщыту къатщтэмэ, армэм контракт щIыкIэм тету ираджэхэм къыхузэрагъэпэщ дзэр щаIыгъ хэ-щIапIэщIэхэр (частыщIэхэр), мыдрейхэр щыIэхэм трагуашэ.
Къэбэрдей-Балъкъэрым и дзэ комиссарыр щыхьэт зэрытехъуэмкIэ, республикэр къэтщтэнщи, гъэр зэрыщIидзэрэ езым я фIэфIыныгъэ хэлъу дзэм къулыкъу щезыхьэкIыну зэгурыIуэныгъэ езыщIылIахэм я бжыгъэр куэд хъуащ.
ЗэгурыIуэныгъэ зэрызэпщIылIэ хъунум хуэгъэза хъыбархэр щIыналъэ псоми щызэбгрезыгъэхыр «ЦУР» (Центр управления регионом) фIэщыгъэр ирату 2022 гъэм дэнэкIи къыщызэрагъэпэща IуэхущIапIэхэрщ. Ар дыдэхэм Интернетым и напэкIуэцIхэм тхыгъэ пыухыкIахэр иралъхьэ, контракт щIыкIэм тету дзэм къулыкъу зэрыщыпщIэнум теухуауэ.
КЪУМАХУЭ Аслъэн.