Кёп болмай «Россельхозцентрни» урлукълукъ жаны бла специалистлери Май, Терк, Прохладна эм Бахсан   районда  кюзлюк  къылкъылыланы болумларын тинтгендиле. Аны чеклеринде уллу  мюлкледе эм  башха иеликледе да   будайны эм арпаны качествосуна тынгы эс бурулгъанды.

Быйыл  къыйын хауа болум сакъланнганына да къарамай, сабанлыкълада къайгъырырча шарт жокъду.  Аурууладан бла къурт-къумурсхадан къорууларча   инсектицид эм гербицид препаратла  заманында  чачдырылгъанларыны  хайырындан оператив  халда мадар этилирча  шарт тюбемегенди.  Ол санда жукъгъан ауруула, къурт-къумурсха неда аман ханс басып халеклик салгъан жерле тинтилмегендиле.

Орта эсеп бла алып  айтханда,  кюзлюк будайны бир гектардан 50-55 центнер эм кюзлюк арпадан да 45 центнер чыгъады. Аны бла бирге сортланы качествосу- 99,8, элитныйлени уа  99,9  процентге жетеди. 

Сабанлыкълада бир тюрлю заран жетген  жер ачыкъланса,    «АгроЭксперт» бир системагъа   координатларын  жибереди. Ызы бла созмай  анга  къажау турурча тийишли эсгертиуле этиледиле.   

Специалистле къылкъылыланы болумларын тинтирча дайым мониторинг бардыргъанлай турадыла.