Нартан дэт школ №1-м мы гъэм къыщIэкI ныбжьы­щIэ­хэм я аттестатхэр щратыжа пшы­хьыр гуапэу екIуэкIащ. Ар къыщIадзащ Урысеймрэ          Къэ­бэрдей-Балъкъэрымрэ я гимнхэмкIэ. Классыр хабжащ ехъулIэныгъэ нэхъыбэ зыгъэ­лъэгъуахэм, зэпеуэ зэ­мы­лIэу­жьыгъуэхэм, олимпиадэхэм абыхэм текIуэныгъэ куэд ­къыщахьащ. Школыр дыщэ медалкIэ къаухащ Ныр Эвелинэ, Хьэгъэбанэ Залинэ, ­Къардэн ФатIимэ сымэ. 

НыбжьыщIэхэм, ахэр езыгъэджахэм, адэ-анэхэм, хьэ­щIэхэм гуапэу захуигъэзащ шко­лым и унафэщI Щоджэн Руслан:
- Япэрауэ, захузогъазэ ди ­ нэIэ щIэтахэм. Нобэ балигъ фы­хъуащ, жэуап­лыныгъэхэр фхьынущ дяпэкIэ. Узын­шагъэ быдэ, ехъулIэныгъэфI, насып ­дахэ Тхьэм къывит! Сыхуейт, къэрал ­экзаменхэр зэре­кIуэ­кIам, ди школыр абы къы­зэ­рыхэщам сыкъытеувыIэну. Уры­сыбзэмкIэ, математикэмкIэ, обществознаниемкIэ, географиемкIэ ди хъыджэбзхэм-рэ щIалэхэмрэ Зыуэ щыт къэ­рал экзаменым къыщахьа ­баллхэр щIыналъэми рес­­публикэми щынэхъы­бэхэм ящыщщ. ТхыдэмкIэ респуб­­ли­кэм нэхъыфI дыдэу къыщалъытащ ­Хьэгъэбанэ Залинэ и лэжьыгъэр - балли 100-кIэ ­игъэзэщIащ. 
ПщIэ зыхуэтщI адэ-анэхэ, апхуэдэ ехъулIэныгъэхэр фэри фи фIыгъэщ. Быныр гъэсэным, еджэным тегъэгушхуэным теу­хуауэ фыщхьэхакъым. Фи ­щIалэхэм, хъыджэбзхэм я ехъу­лIэныгъэфIхэм дяпэкIи фы-щы­гу­фIы­кIыу Тхьэм куэдрэ фащхьэщигъэт! 
Аттестат зыIэрыхьэж ныбжьыщIэхэм ехъуэхъуащ Шэ­джэм щIыналъэм и адми­нистрацэм и унафэщIым и къуэ­дзэ Сэбан Заурбэч. 
- Ныщхьэбэ фи нэгум гуфIэгъуэ къызэрырихым хуэдэу, гъа­щIэ дахэ фиIэну сыфхуо­хъуахъуэ. IэщIагъэу фы­зэ­хъуапсэм  Тхьэм фи насып хилъ­хьэ, Фэ школкIи фехъу­лIащ, къапщтэмэ. Нартан дэт школ №1-р республикэм щы­нэ­хъыфIхэм хабжэ, фезыгъэ­джахэр я гуащIэ еблэжакъым   щIэныгъэ ­лъабжьэ быдэ фиIэным теухуауэ, - жиIащ   абы. 
Шэджэм щIыналъэм егъэ­джэныгъэмкIэ и IуэхущIапIэм     и щIэныгъэлI ­нэхъыщхьэ Ало Ис­лъам балигъ гъащIэм хы­хьэхэм ехъуэхъуащ щIэныгъэ куу зэрагъэгъуэтыну, насып ­яIэну. 
- Псом нэхърэ нэхъыфIыр нэхъ ­гуапэр, нэхъ щIэщыгъуэр къы­вэхъулIэну сыхуейщ. Фи щIалэгъуэм куэду хрет гуфIэ­гъуэ, щIэныгъэ, лъагъуныгъэ. Гъуэгу махуэ! - яжриIащ ныбжьы­щIэхэм я класс уна­фэщI Мэ­шыкъуэ Алёнэ. 
Школыр къэзыуххэм я япэ егъэджакIуэ  Шэджэм Жанетэ абыхэм ­ехъуэхъуащ гъуэгу дахэ къыхахыну, пэ­жым тетыну, я мурадхэм лъэIэсыну, адэ-анэ­хэр куэдрэ ягъэгуфIэну. 
Адэ-анэхэм къабгъэдэкIыу пшыхьым къыщыпсэлъащ Хьэгъэбанэ ФатIимэ. 
- Сыхуейщ, япэрауэ, ныбжьы­щIэхэм захуэзгъэзэну: дэнэкIэ вгъазэми, гъуэгу дахэ  Тхьэм фытригъэувэ! ЩIэныгъэм фы­хуэпабгъэ, хэлъэт ­зивгъэIэ, пэжым фрителъхьэ, гуапэу фыщыти, фи гум ифлъхьэ  фIыгъуэхэр къывэхъу­лIэнущ. Адэ-анэхэм къабгъэдэкIыу ­школым и лэ­жьа­кIуэхэм фIыщIэ фхузощI. Ди бынхэр къэкIуащ гурэ псэкIэ егъэджакIуэ цIэм хуэпэжхэр  щы­лажьэ школым. Дэтхэ­нэ-ми бгъэдыхьэкIэ къыхуэв­гъуэ­тащ, щхьэж нэхъ зыдихьэхыр хуэвгъэдэхащ, еджэным девгъэхьэхащ, цIыхугъэ яхэ­лъы­ным хуэвущиящ. Тхьэм фигъэп­сэу!
Пшыхьым кърихьэлIахэр ирагъэп­лъащ ныбжьыщIэхэм ягъэ­хьэзыра концертым. 

ГУГЪУЭТ  Заремэ.