Кёп болмай,  КъМР-ни Саулукъ сакълау  министерствосу чакъырып, Къабарты-Малкъаргъа Красноярск крайны менеджмент системала жаны бла консультанты   Сергей Дранишников келгенди.

 Бюгюнлюкде Красноярск  крайны клиника больницасы къыралда эм игиледен бирине саналады. Ол кёп тюрлю аурууладан бакъгъан арады. Анда  къуралгъан амалла уа специалистлеге,  саусузлагъа да тапдыла эм бюгюннгю излемелеге  келишедиле.

Къонакъ Нальчикни  1-чи номерли клиника больницасында     мастер-классла бардыргъанды. Анга шахарны 1-чи, 2-чи номерли  саулукъ сакълау учрежденияларыны, Кёп профильли больницаны эм Прохладныйде  ара больницаны  баш врачлары, специалистлери эм медсестралары  къатышхандыла. Ала  кёбюсюнде жангы амаллагъа кёре медицина  болушлукъ берирге  юйреннгендиле.

Эсге сала айтсакъ, озгъан айда Рустам Калибатов коллегалары бла бирге Красноярск крайда болуп, аланы саулукъ сакълау бёлюмлерини сынаулары бла толу шагъырейленип келгенди. Аны бла бирге  алада хайырланнган алчы технологияланы да республикада сингидирирге оноу этгенди.