Кёп болмай Пятигорск шахарда «Машук» билим бериу арада «Мени Провинциям» деген аты бла тёрели битеуроссей фестиваль болгъанды. Ол телевидение фильмлени бла бериулени 24-чю эм радиону бла басманы 17-чи фестивальларын бирлешдиргенди.  Аны магъанасы – Россейни регионларында асламлы информация органланы (СМИ) келечилерин Шимал-Кавказ федерал округну адет-тёрелери, маданиятлары, тарыхлары, экономика болумлары, тамаша табийгъаты эм туризм онглары бла шагъырейлендириргеди.

Аны чеклеринде ТАСС –  федерал информация агентство «Регион журналистиканы школу» деген билим бериу семинар бардыргъанды. Анга къыралны регионларындан, ол санда Шимал Казказны субъектлеринден, эки жюз чакълы журналист, пресс-службаланы келечилери эм  студентле да къатышхандыла.

Бу жол спикерлени борчларын ТАСС-ны  сынамлы эм белгили журналистлери толтургъандыла: информация агентствону таматасыны орунбасары Андрей Соколов, пресса-араны таматасы  Николай Яковлев, жангылыкъла бла байламлы журналистикадан билим бериу араны таматасы Юрий Родионов, регион жангылыкъла бла байламлы бёлюмню таматасы Андрей Цицинов, Урал областьда информ агентствону таматасы Мария Картуз эм СМИ, реклама, Интернет бла байламлы бёлюмню таматасы Павел Клундук сёлешгендиле.

Семинарны башлай, Андрей Соколов журналистлеге быллай тюбешиуню уллу магъанасы болгъанын белгилегенди. Аны кезиуюнде сынамлы специалистле, лекцияла окъугъандан сора да, коллегалары бла ушакъ этерге, жангы шартланы юсюнден билирге онг табарыкъларын чертгенди. Ол къайсы усталыкъда да жетишимли болур ючюн , айныргъа итинирге кереклисин эсге салгъанды эм коллегаларына жетишимле тежегенди. 

Николай Яковлев да Интервьюну къалай алыргъа керек болгъанын мастер-классда кёргюзтгенди. Интервью окъуучулагъа сейир болур ючюн, эм биринчиден, журналист теманы иги билирге эм тюз соруула берирге кереклисин чертгенди. Арада ачыкълыкъ, ышаныулукъ болмай,  ушакъ къыйматлы болмазлыгъын да эсгертгенди. Эм башы уа – журналист ишине кертичилей къалыргъа борчлу болгъанын энчи белгилегенди. «Жууаплы адам тутхан ишин осал этер амалы жокъду»,- деп къошханды.

Юрий Родионов а федерал СМИ-ге жангылыкъланы хазырларгъа юйретгенди. Ол айтханыча, регионлада саулай къыралгъа сейир болурча жангылыкъла аз тюйюлдюле. Андрей Цицинов да "Медиатренды" темагъа интерактив лекция бардыргъанды. Мария Картуз медиагъа материалла жарашдырыуну юсюнден хапарлагъанды. 

Семинарны кезиуюнде Пензадан, Башкъортостандан, Дагъыстандан, Ингушетиядан, Къабарты-Малкъардан эм башха регионладан да аслам соруу берилгенди. Аланы кёбюсю журналист белгили болур ючюн не этерге кереклисини, сейир интервью алырча онгланы юслеринден эдиле. Жамауатны жарсыуларын ачыкълауну, властьны бла СМИ-ни арасында байламлыкъланы, журналистни бусагъатда даражасыны эм кёп башха затланы юслеринден да сёлешиннгенди.  

 Ахырында семинаргъа къатышханланы барысына да шагъатлыкъ къагъытла берилгендиле. 
Эсге сала айтсакъ, « Мени Провинциям» 1999 жылдан бери бардырылады эм журналистле къатышхан уллу форумладан бирине саналады. Фестивальны къурагъан эмда анга башчылыкъ этген Елена Фоминыхди. 

Курданланы Сулейман.