Кёп болмай «Цифралы тенгсизликни кетериу»  федерал программаны  чеклеринде Къабарты-Малкъарда «Ростелеком» биригиу жангы станция салгъанды.  Аны бир  сетьге къошарча биригиуню келечилери беш километрден аслам   оптоволокно чыбыкъ тартхандыла. Алай бла  Прохладна районда   Матвеевский, Ново-Вознесенский эм  Придорожное элле бюгюннгю связьны эм цифралы амалланы хайырланыргъа   онг тапхандыла.  

- Федерал программа бизни регионнга болмагъанча магъаналыды. Аны хайыры бла гитче элчикледе окъуна  мобиль  связь эм терк  Интернет  ишлейди.    Бюгюнлюкде  юйден чыкъмай   смартфон бла къырал жумушланы тамамлар онг барды.    Жылны ахырына дери быллай  энтта да эки база сюертир муратыбыз барды, - деп билдиргенди «Ростелеком» биригиуню бёлюмюню таматасы Залим Хутов.

Программагъа кёре  беш жюз адамдан кёп жашамагъан  гитче  элчикле  да чыпынлы станция  бла жалчытылынадыла.  Ала  оптоволокно чыбыкълагъа къошулгъанлары ючюн  бирси жерлегеча  терк ишлеген Интернет бериледи.   Ол  шарт  видеосвязьгъа чыгъаргъа, узакъдан ишлерге, окъургъа, къырал эм башха жумушланы тамамларгъа болушады.

-  Бизни эл проектге къошулгъанына  бек къууаннганбыз. Энди телефон бла чырмаусуз сёлешаллыкъбыз, Интернет бла жумушларыбызны тамамларыкъбыз. Болумубузну  игилендирирча быллай мадар этилгени элде жашаргъа сюйгенлени да тартындырлыкъды, башхала да кетерге ашыгъырыкъ тюйюлдюле.  Ол муниципалитетни  комплекс халда айнытыугъа эм экономика жаны бла кючлерге да  ахшы себепликди, -  деп къошханды Придорожное элни администрациясыны башчысы Андрей Плотников.

Сагъынылгъан программаны эм башха къыйматлы проектлени юсюнден толуракъ  билдириулени «Ростелеком» биригиуню сайтында табаргъа боллукъду.

Бизни корр.