Келир айны биринчисинден башлап контроль-касса реформаны ючюнчю кезиую бардырылып тебирерикди. Аны бла энди бирикген налог (ЕНВД) тёлеген эмда ишлерин патент алып бардыргъан энчи предпринимательле сатыу-алыуда быллай техниканы хайырланыргъа керекдиле. Сёз мында ишчиле тутмай розница сатыу-алыу бла кюрешгенлени юсюнден да барады, деп билдиргендиле ФНС-ни Къабарты-Малкъарда Управлениясындан.

Бу кюнлеге бизни республикада жангы жорукълагъа тийишлиликде 5459 быллай контроль-касса аппарат хайырланылады. Аладан жети жюзден артыгъын налог органлагъа барып салгъандыла учётха, къалгъанларын а – «Энчи кабинетни» хайыры бла.

Быллай аппарат орнатхан предпринимательлеге, аланы хар бири ючюн (1 июльгъа дери эсепге тюшюрселе аны) налог тёлеулеринден бир кесеги артха къайтарыллыкъды. Аны ёлчеми 18 минг сомгъа жетеди.

Жангы контроль-касса техниканы тюрлюлери эмда аланы билдириулерин жибериу бла кюрешген операторланы толу тизмеси бла Налогла службаны интернет-сайтында «Реестрле эмда контрагентлени тинтиу» деген бёлюмде (https://www.nalog.ru/rn07/related_activities/registries/) шагъырейленирге боллукъду. Анда «Контроль-касса техниканы хайырланыу жаны бла жангы жорукъла» (https://www.nalog.ru/rn07/taxation/reference_work/newkkt/) деген бетде уа бу иш бла байламлы жангылыкъла эмда ангылатыу материалла басмаланадыла. Соруулары болгъанла ведомствогъа телефон бла сёлеширге боллукъдула. Управленияныкъы ма буду: 8(8662)74-31-88, Нальчикде бёлюмленикиле уа быладыла: 8(8662)77-62-66, 42-11-63.