Кёп болмай Петербургда  XXVI халкъла аралы  экономика   форумда   «Ростех» къырал корпорация  бла  ВТБ банк  байламлыкъда Тырныауузда вольфрам-молибден къазгъан комбинатны  ишлетирге келишгендиле.

ВТБ банкны президентини орунбасары Валерий Лукьяненко билдиргенича,  проект Къабарты-Малкъардан башха,  саулай къыралгъа да  магъаналыды. Аны бла бирге ол шарт   Россейде  импортну алышындырыугъа да  ахшы себеплик этерикди.

«Ростех» биригиуню таматасыны  орунбасары  Дмитрий Меликов ВТБ банк  къыйматлы проектлени бардырыргъа билеклик эте келген, иги да сынамлы болгъанын белгилегенди. Ол  бусагъатда да  бу магъаналы эм уллу проектни бардырыргъа болушханын ахшы шартха санагъанды.

Келишимге кёре Къабарты-Малкъарда Россейни стратегиялы промышленность бёлюмюнде даражалы жерни алгъан  уллу промышленный комплекс къураргъа  онг табыллыкъды. Аны бла байламлы оюмларын республиканы таматалары да билдиргендиле.   

- Бийик технологиялы эм экология жаны бла къоркъуусуз  предприятие  жылгъа  1,5 миллион тонна магъадан жарашдырлыкъды эм 800 адамгъа ишчи жерле къурарча себеплик этерикди.  Алай бла сагъынылгъан материалла бла  къырал кесин  толсунлай жалчытырча боллукъду.  Тырныауузну комбинаты Европада иги кесек вольфрам магъадан  сакъланнган  жерледен бирине саналады- дегенди КъМР-ни Башчысы Казбек Коков.

Вольфрам бла молибден табийгъатда аз тюбен темирледиле. Болсада ала   металлургияда,  нефтехимияда, космос бла байламлы эм башха бёлюмледе да кенг хайырланыладыла.  

Комбинат ишин 1940 жылда башлагъанды,  2001 жылда уа ишин тохтатыргъа тюшгенди. Алай бла 2018 жылда аны «Ростехни» санына кирген  «Эльбрусский горнорудный комбинат» биригиу алгъанды.

Бизни корр.