Къабарты-Малкъар къырал аграр университетде къурулуш эмда жерлени жарашдырыу бёлюмде «Къурулушда, табийгъатны жарашдырыуда, эл мюлк производствону механизациясында инновациялы жангычылыкъла» деген ючюнчю Битеуроссей илму-сынам конференция ётгенди. Аны ишине алимле, къурулушчула, аграр бёлюмде уруннганла, экспертле да къатышхандыла, деп билдиргендиле вуздан.

Сагъынылгъан факультетни башчысы Афрасим Балкизов, къонакълагъа салам берип, конференцияда сюзюуге 55 илму статья чыгъарылгъанын билдиргенди. Вузну илму-излем бёлюмюню башчысы Аслан Жемухов а жыйылыугъа къатышханланы ишлери къыйматлы болурун тежегенди.

Докладланы юслеринден айтханда, КъМКъАУ-ну келечиси, техника илмуланы кандидаты Къазийланы Валерий мекямланы техникалы эмда хайырланыу жаны бла ышанларын белгилеуню юсюнден хапарлагъанды. Доцент Индира Микитаева уа къурулушну программалагъа таянып айнытыуну юсюнден сёлешгенди. «Эл мюлкню механизациясы» кафедраны доценти Габаланы Алий жер сюрюуде хайырланылгъан техниканы энчиликлери бла шагъырейлендиргенди.

Конференцияда дагъыда кёп темаланы юслеринден айтылгъанды. Анга къатышханла оюмларын туура этгендиле, башхаланы сынамларын да сюзгендиле.

Бизни корр.