Адам къолайсызыракъ болуп, алгъын алгъан кредитин къыйналып къайтарып башлагъан эсе, аны тёлеуню алты айгъа тыяргъа боллукъду. Бу амалны хайырланыргъа сюйгенлеге быллай излемле бардыла:

- Адамны къолуна тюшген ахча ючден бирине азайса. Ол аны аллында ай бла эмда 2022 жылгъа орта кёрюмдю бла тенглешдиргенде. Бир кредитни талай адам алгъан эсе, аланы барыны да къолайлыкълары тергеледи;

- Кредит келишим 2022 жылда 1 мартха дери этилген эсе;

- Кредитни ёлчеми:

* абери сатып алыргъа берилген ахча – 300 минг сом. Аны энчи предприниматель алгъан эсе – 350 минг сом;

* автокредит – 700 минг сом;

* ипотека – 3 миллион сом, Москвагъа эмда Москва областьха – 6 миллион сом, Санкт-Петербургга эмда Узакъдагъы Востокга – 4 миллион сом;

* кредит карта – 100 минг сом.

- Ахча алгъан инсан кредит каникул излеп, банкга 2023 жылда 1 декабрьге дери жазып неда телефон бла сёлешип билдирген эсе. Ары къолайлыгъы азайгъаннга шагъат этген документлени да жиберирге боллукъду;

- Банкга сёлешген сагъатда адамны ол кредитини юсю бла башха каникул берилмеген эсе;

Быланы юсюнден 2020 жылда 3 апрельде чыкъгъан 106-ФЗ номерли федерал законну 6-чы статьясында эмда РФ-ни Правительствосуну 2023 жылда 30 майда 868 номерли бегиминде айтылады.

Кредит тёлеуню болжалына салыу къалай ишлейди?

Льгота кезиуде аны тёлемезге эркинлик бериледи, аны ючюн тазир да салынмайды. Сюйсегиз а, аны болжалына салыуну орунуна тёлеуню ёлчемин азайтыргъа боллукъсуз.
Сагъынылгъан кезиуде процентле къошулуп турлукъдула. Аланы уа, борчугъуз бла бирге, артда тёлерге жарайды. Жангы графикни банк жарашдырлыкъды.
Кредитни къайтарыу болжалына ол льгота кезиу да къошуллукъду. Каникулла бошалгъандан сора айлыкъ тёлеу тюрленирик тюйюлдю.
Кредит каникул алыр ючюн банкдан ыразылыкъ алыргъа керекмейди. Ол заявление бла бериледи. Сагъынылгъан излемлеге келишиу болмаса – анга угъай дерге боллукъдула.

Улбашланы Мурат хазырлагъанды.