Къабарты-Малкъар Республиканы Башчысы Казбек Коков озгъан баш кюн  Россейни Жигити Нурмагомед Энгельсович Гаджимагомедовну  атын ёмюрлюк этиу бла байламлы ишлеге къатышханды. Дагъыстанлы жаш аскер борчун толтура, энчи аскер операцияны кезиуюнде ажымлы жоюлгъанды.  Аны аты энди Нальчикде алгъын Центральный  орамгъа аталгъанды.

Жигитни  атын ёмюрлюк этиу бла байламлы юйню къатында митинг болгъанды. Алайгъа КъМР-ни Правительствосуну Председатели  Мусукланы  Алий, жашны атасы Энгельс, башха жууукълары, Дагъыстанда Старейшинала советни председатели Шамсулгуда Магомедов, Нальчикде Кьурулушну эмда урунууну советини ветеранларыны председатели Абдуллаланы Мустафа, Къабарты-Малкъарда болгъан  жамауат-культура араланы башчылары, келечилери, ол орамда  жашагъанла да келгендиле.

Митингде чыгъып сёлешгенле жаш  къаллай болгъаныны, аны  жашау жолуну юсюнден да  кёп хапар айтхандыла. Аны аты ол тийреде жашагъан къоншулагъа угъай да, битеу республикагъа да билгилиди, кёпле анга бюгюнлюкде  хурмет этедиле.

Кавказны казак полкуну  247-чи гвардейский десант-штурмовой  отрядыны тамата лейтенанты Нурмагомед Гаджимагомедовха «Россейни Жигити» деген атны  (ёлгенинден сора) Россей Федерацияны Президенти Владимир Путинни  Указы бла  озгъан жылны  март айыны 22-чи кюнюнде аталгъанды.

Ол 1996 жылны 29 сентябринде  Дагъыстан Республиканы Южно-Сахалинск шахарында туугъанды. 2012 жылда  Россей Федерацияны Сауутланнган кючлеринде къуллукъ этгенди. Аскер командировка бла Сириягъа эки кере баргъанды, бир ненча майдал бла да саугъаланнганды. Энчи аскер операциягъа биринчилени санында къатышханды. Десантчыланы колоннасы  душманны  бек  кючлю аскерлери бла бетден-бетге тюбешеди. Ауур жаралы болуп тургъанына да къарамай, Нурмагомед  къазауатдан кетмей, ахыр огъуна дери  уруш этгенди. Жаш жашауун аямай, полкну энчи  къауумун  ёлюмден къутхарыр ючюн, кесин, душманны аскерчилерин да  чачдыргъанды.

Нурмагомед Гаджимагомедов  бир ауукъ заманда  Нальчикде жашагъанды.  Къабарты-Малкъарны уа кесини экинчи юйюне санагъанды. Ол Минги  таугъа да чыкъгъанды.

Бюгюнлюкде ол жашагъан орамгъа аны аты аталгъанды.

Дагъыстан Республикадан, кёп башха жерледен да  келген къонакъла къатышхан митингде Казбек Коков сёлеше, былай дегенди: «Бюгюнлюкде бизни жашларыбыз чынтты эр кишилеча, жанларын, къанларын да аямай,  къыралыбызны къорууларгъа тургъандыла. Аллай жашладан бирлери уа  Нурмагомед эди.  Аны аты Россей къыралны тарыхына ёмюрге жазылгъанды эмда мындан ары ёсюп келген тёлюню юйретиуде, анга юлгю боллукъду. Аны ёсдюрген атагъа бла анагъа  уллу ыспас этип, баш урама. Ала керти да чынтты таулу жашны, туугъан журтуну патриотун ёсдюргендиле».

Битеу дагъыстанлыланы, энчи лак миллетлилени атындан  Къабарты-Малкъарны оноучуларына эмда адамларына бюсюреуюн, ыспасын да  Дагъыстанны Старейшинала советини председатели Шамсулгуда Магомедов  айтханды. «Сиз, Казбек Валерьевич, шахарыгъызны бу ариу орамларындан бирине бизни жерлешибизни, жигит жашыбызны  атын атагъансыз. Бек сау болугъуз. Бу орамда жашагъанланы иги кесеги Нурмагомедни танымай амалы жокъ эди. Ол жашауну, адамланы сюйген сейирлик жаш эди.  Къабарты-Малкъарны бла Дагъыстанны халкъларыны араларында быллай бу биринчи аламат ишди. Мен Сизни атагъыз Валерий Мухамедович бла кёп кере тюбешгенме. Аны юйюнде болгъанма. Туз-гыржынын да ашагъанма. Ма бюгюн а  сизни барыгъызгъа да жюрек ыразылыгъымы билдиреме, бизни республикада жашагъанланы атындан  ыспас этеме»,-дегенди Шамсулгуда Магомедов.

Андан сора мекямны къабыргъасында  жигитни сураты эмда жазыулары бла мермер къанганы жигитни атасы Энгельс бла Казбек Коков ачхандыла. Алайгъа келгенле бир минутну  шош сюелгендиле,  къанганы тюбюне гюлле да салгъандыла. Ызы бла  мекямны ичине кирип, Нурмагомедни суратлары бла кёрмючге да къарагъандыла.

Холаланы Марзият.