Курыт щIэныгъэ щрагъэгъуэт IуэхущIапIэхэр зэгъэпэщыжыным икIи егъэфIэкIуэным хуэунэтIа программэр зэрагъэзащIэр къахутэу Май икIи Тэрч щIыналъэхэм иджыблагъэ щыIащ Урысей Федерацэм и Федеральнэ Зэхуэсым и Къэрал Думэм и депутат Родинэ Викториерэ КъБР-м егъэджэныгъэмрэ щIэныгъэмкIэ и министр Езауэ Анзоррэ.

«Урысей зэкъуэтым» и щIыналъэ штабым игъэува лэжьыгъэм ипкъ иткIэ, Родинэ Викториерэ Езауэ Анзоррэ Майскэм дэт 2-нэ икIи 5-нэ курыт еджапIэхэр, Александровскэ (Бжэкъалэ) дэт курыт еджапIэр зэрызэрагъэпэщыжым, Май къалэм дащIыхь курыт еджапIэ №14-м епха ухуэныгъэхэр зэрекIуэкI щIыкIэм зыщагъэгъуэзащ.

Май щIыналъэм щIыпIэ унафэр щызехьэнымкIэ и IуэхущIапIэм и унафэщI Саенкэ Татьянэ ящIыгъуу, къулыкъущIэхэм ухуэныгъэхэр щекIуэкI щIыпIэм зыщаплъыхьащ, лэжьыгъэхэр здынэсар зрагъэщIащ. Апхуэдэу ахэр ирипсэлъащ Iуэхур щызэфIэкIыну зэманым, программэм къигъэув пIалъэм ухуэныгъэр зэризэгъэнум. Мыхьэнэшхуэ иIэу къалъытащ екIуэкI лэжьыгъэм и фIагъым, къыхуэгъэзэжрэ зэгъэпэщыжрэ къыхэмыкIыу ар зэпэщу зэтеублэн зэрыхуейм.

Родинэ Викторие къызэрыхигъэщамкIэ, щIыналъэм щекIуэкI лэжьыгъэм унафэ зэриIэр нахуэщ, ухуакIуэхэм я къалэныр и чэзум зэрагъэзэщIэнури ялъэгъуам нэрылъагъу къащещI. «ХъыбарегъащIэ IэнатIэхэм дэ мызэ-мытIэу щыжытIащ Къэбэрдей-Балъкъэрым и егъэджэныгъэ IэнатIэм лэжьыгъэшхуэ зэрыщекIуэкIыр. Ахэр я фIагъкIэ зыхуей-зыхуэныкъуэхэмкIэ къызэгъэпэщауэ зэрыщытыным дыхущIокъу. Ухуэныгъэхэр зэрекIуэкI щIыкIэм цIыхухэр зэпымычу щыгъуазэ дощI. Къыхэгъэщын хуейщ щIыналъэхэм щIыпIэ унафэр щызезыхьэ IуэхущIапIэхэм я унафэщIхэмрэ лэжьакIуэхэмрэ, еджапIэщIэхэм щIэтIысхьэжыну сабийхэм я адэ-анэхэм, жылагъуэ лэжьакIуэхэм я нэIэ къызэрыттетри. Апхуэдэу дызэрызэдэлажьэм ифI къыдэкIащ - нэгъабэ жылагъуэ зыбжанэм еджапIэщIэхэр дэтщIыхьу гъэ еджэгъуэщIэм ирихьэлIэу дутIыпщын тхузэфIэкIащ. Къыхэзгъэщынут еджапIэщIэхэр иджырей ухуэныгъэ мардэхэм тету зэращIыр, сабийхэм зыщагъэпсэхуну, щеджэну пэш Iэхуитлъэхуитхэр зэрыхащIыхьыр. ЕджапIэщIэхэр щIыным нэхърэ мынэхъ мащIэу дыхущIокъу щыIэхэр зэгъэпэщыжыным, зыхуей хуэдгъэзэным. Зэрытлъагъущи, зэзыгъэпэщыж лэжьыгъэхэм къызэщIаубыдэ еджапIэхэм я щхьэр, бжэхэмрэ щхьэгъубжэхэмрэ зэхъуэкIыныр, пэшхэм я лъэгу щар къихауэ щIэ идзыжыныр, уэздыгъэ зэрыкIуэ кIапсэхэр, бжьамийхэр щIэуэ щIэшэжыныр, унэ кIуэцI блынхэр зехьэныр. Май щIыналъэм щекIуэкI лэжьыгъэм арэзы сыкъещI, зэIумыбз гуэрхэр къыхэкIми, ар зэбгъэзэхуэжыфыну щытщ, программэр зэщIа хъуным пэрыуэгъу хуэхъуркъым», - къыхигъэщащ министрым.

А махуэ дыдэм Родинэ Викториерэ Езауэ Анзоррэ Тэрч щIыналъэм щыIащ. ЩIыпIэ унафэр зехьэнымкIэ IуэхущIапIэм и унафэщIым и къалэнхэр зыгъэзащIэ Хъущт Аслъэнбий «Егъэджэныгъэ IэнатIэм зегъэужьын» щIыналъэ программэм ипкъ иткIэ Тэрч къалэм дэт еджапIитIым - лицей №1-мрэ Мэлбахъуэ Тимборэ и цIэр зезыхьэ курыт еджапIэ №3-мрэ - лэжьыгъэр зэрыщекIуэкIым хьэщIэхэр щигъэгъуэзащ. УхуакIуэхэм зэрыжаIамкIэ, еджапIэхэм псымрэ хуабэмрэ щIэшэн, уэздыгъэ кIапсэхэр къэгъэщIэрэщIэжын, бжэ-щхьэгъубжэхэр зэхъуэкIын я лъэныкъуэкIэ щIапхъэ зыри къэнакъым. Апхуэдэу щыт пэтми, иджыри лэжьыгъэшхуэ къапэщылъщ. И чэзум зэфIэкIынуми, еджапIэ унафэщIхэм я къалэныр игъуэм зэрамыгъэзащIэм лэжьыгъэхэр къыщилъахъэ зэрыщыIэр ухуакIуэхэм яущэхуакъым.

Мы лъэхъэнэм лэжьыгъэ нэхъыбэ здэщыIэр лицей №1-ращ. 2000 гъэм къатищу зэтету абы къыпащIыхьа унэр зэрахьащ, Iэпкълъэпкъым зыщрагъэужь пэшитIым щыщу зыр зэрагъэпэщыжащ. IуэхущIапIэм щыщу 1967 гъэм яухуам хиубыдэ пэшхэр иджыпсту зыхуей хуагъазэ, инженер Iэмэпсымэхэр зэрахъуэкI, IуплъапIэр къагъэщIэрэщIэж. ДяпэкIэ къапэщылъщ шхапIэм, ерыскъы зехьапIэм, Iэпкълъэпкъым зыщрагъэужь етIуанэ пэшым ухуэныгъэ лэжьыгъэхэр иращIылIэну.

Ухуэныгъэ лэжьыгъэхэр зыгъэзащIэ гупми еджапIэ унафэщIхэми министрым ткIийуэ япиубыдащ я къалэныр программэм къигъэув пIалъэм - 2023 гъэм и шыщхьэуIум и 1-м - фIамыгъэкIыу кърахьэлIэну.

ЩХЬЭЩЭХУЖ Инал.