«Урысей Федерацэм и субъектхэм я къулыкъущIэ нэхъыщхьэхэмрэ гъэзэ­щIакIуэ властым и органхэмрэ я лэ­жьэкIэр къызэралъытэ щIыкIэм и IуэхукIэ Урысей Федерацэм и Президент Путин Владимир къыдигъэкIа Указым республикэм и щIыналъэм ­щыгъэзэщIэным теухуауэ КIуэкIуэ Казбек иригъэкIуэкIа зэIущIэм щIэсащ КъБР-м и Правительствэм и унафэщI­хэр, министерствэхэмрэ ведомствэ­хэм­рэ я Iэтащхьэхэр.
Стратегие мыхьэнэ зиIэ документым къыщыгъэува къалэнхэм япкъ иткIэ иджыпсту зэхалъхьэ щIыналъэхэм щалэжьыну Iуэху пыухыкIахэр, 2024 гъэм нэсыху ахэр къызэралъытэну методикэхэр, апхуэдэу УФ-м и Правительствэм а Iуэхухэм папщIэ хиха федеральнэ ­грантхэмрэ бюджет зэхуаку трансфертхэмрэ зэтрагуэшэну хабзэхэр.
Къалэн нэхъыщхьэ дыдэхэм ящыщщ экономикэм бюджетым химыубыдэ и ­IэнатIэхэм хъерышхуэ къызыпэкIуэ лэ­жьапIэщIэхэр къыщызэIухыныр, бизнесым и IэнатIэ мыинымрэ курытымрэ щылажьэхэм я бжыгъэхэм хэгъэхъуэ­ныр, цIыхухэм я щIэныгъэр къэIэтыныр, псэупIэхэр нэхъ щIэгъэхуэбжьауэ ухуэ­ныр лэжьапщIэр нэхъыбэ щIыныр, капитал нэхъыщхьэм къыхузэщIагъэуIуэ инвестицэхэр гъэбэгъуэныр, щIыналъэ мы­хьэнэ зиIэ иджырей автомобиль гъуэгухэмрэ гъуэгу зэхэкIыпIэхэмрэ зегъэубгъуныр, нэгъуэщIхэри.
КъБР-м и Правительствэм и УнафэщI Мусуков А. ТI., КъБР-м экономикэ зыу­жьыныгъэмкIэ и министр Рахаев Б. М., КъБР-м ухуэныгъэмрэ гъуэгу хозяйствэмкIэ и министр Къуныжь В. Хь.,                 КъБР-м узыншагъэр хъумэнымкIэ и министр Хъубий М. Б., КъБР-м лэжьыгъэм­рэ социальнэ зыужьыныгъэмкIэ и ми­нистр Асанов А. О. сымэ къапсэлъахэм едэIуа нэужь, республикэм и Iэтащхьэм жиIащ: «ИпэжыпIэкIэ ахэрщ дяпэ илъэс зыбжанэкIэ къэралым и социальнэ экономикэ зыужьыныгъэм и унэтIыныгъэ нэхъыщхьэу щытынур икIи дэтхэнэ щIыналъэми а Iуэхухэр зэрыщызэфIагъэ­кIыфыр унафэщIхэм я лэжьэкIэр къэзыгъэлъэгъуэнур. Мыбдеж псом япэу гу лъывэзгъэтэну сыхуейщ лэжьыгъэм и фIагъыр къызэралъытэ щIыкIэми, методикэ, отчёт зэмылIэужьыгъуэхэми, шэч хэмылъу, мыхьэнэшхуэ зэраIэр. Ауэ а бжыгъэ гъущэхэм дыщеплъкIэ къыдгурыIуэн хуейщ абыхэм я купщIэр зы­хуэдэр. А псоми IэхъуэгъуэтегъэкIыу де­мыплъу, япэ идгъэщын хуейщ бжыгъэхэр зытещIыхьа Iуэхухэр».
КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ К. В. Прави­тельствэм я унафэщIхэм ящIыгъуу хэп­лъащ жылагъуэхэм дэлъ къабзагъэм, республикэм и жылагъуэхэр зэблэу къы­хэмыкIыу псыкIэ къызэгъэпэщыным, ­мэкъумэш щIапIэхэр уэм щыхъумэным пыщIа Iуэхухэм. КъБР-м и Правитель­ствэмрэ муниципальнэ щIыналъэхэм я Iэтащхьэхэмрэ хуагъэуващ ахэр зэфIэгъэкIыным текIуэдэну ахъшэм и хэ­кIыпIэхэр яубзыхуну.