Зи щэхухэр нэсу къэтIэщIа хъуа бзэ дунейм тету къыщIэкIынкъым. Ар кIадэм ещхьщ - къызэтепхыху, зы телъыджэ гуэр къыдэкIыу, къызэбгъэдзэкIыху, зы хьэлэмэт гуэр и щIыIу къэхъуу. Бзэр хъугъуэфIыгъуэ псо ирокъу, и зэхэлъыкIэ-гъэпсыкIэм хэлъ щхьэхуэныгъэм къищынэмыщIауэ, лъэпкъым и гурыгъузи, и гугъапIи, и хъуэпсапIи ихъумэу. Зы ныбзэ фIэкIа мыхъуми, бзэм и зы Iуэхугъуэ къыщыпIэткIэ, къызэкъуихыр щIэныгъэм и къигъэхъуапIэ мэхъу, лъэпкъ гупсысэм и зы налъэ егъуэтыж. Апхуэдэ зы жэрдэмт ХьэтIохъущокъуэ Къазий и цIэр зезыхьэ Адыгэбзэ Хасэм иджыблагъэ иригъэкIуэкIа, «ЩIэнхабзэ лъахэ» зи фIэщыгъэ зэпеуэри.
КъэхутакIуэ ныбжьыщIэхэм я хэгъэгупсо зэпеуэр мы гъэм еплIанэ зэхохьэ. Абы зыхуигъэувыж пщэрылъхэм ящыщщ щIэблэр анэдэлъхубзэм нэхъ набдзэгубдзаплъэ хуэщIыныр, и дахагъымрэ къулеягъымрэ зыхегъэщIэныр, бзэм и лэжьэкIэм хэлъ гъэщIэгъуэнагъым дегъэхьэхыныр, а псом кърикIуауэ анэбзэр нэхъыфIу егъэлъагъуныр, ирипсэлъэныр яфIэфI щIыныр.
ЗэIущIэ купщIафIэр щекIуэкIащ ЕгъэджакIуэхэм я IэщIагъэмрэ щIэныгъэмрэ щыхагъахъуэу Налшык къалэм дэт центрым. Мыбы щызэпеуащ къэхутэныгъэм дихьэх, 8 – 11-нэ классхэм щIэсхэр. НыбжьыщIэхэм утыку кърахьа лэжьыгъэхэр теухуат адыгэбзэм куэду щылажьэу, адыгэ гъащIэм щхьэпагъ щызиIэ псалъэхэм я лъапсэр къэхутэным: «унэ», «махуэ», «нэху», «цIыху», «гъуэгу», «уафэ», «гъатхэ», «хуабэ», «гупсысэ», «нэхущ», «хужь».
ЕджакIуэм къихутэн хуейт псалъэ къыхихар и анэдэлъхубзэм зэрыщылажьэ щIыкIэр: и купщIэр, псалъэ зэпхахэм зэрыхэувэр, къызэрыхъу щIыкIэр, къытекI псалъэхэр. Абы къищынэмыщIауэ, еджакIуэм къихьын хуейт къэхутэныгъэ зрищIэкI псалъэр къызыхэхуэ псалъэжьхэр, жыIэгъуэхэр, къуажэхьхэр, псынщIэрыпсалъэхэр, къигъэлъэгъуэн хуейт дэтхэнэ зы жьабзэ къэгъэщIыгъэми псалъэр зэрыхэлажьэ, хилъхьэ мыхьэнэр, къиIуатэ гупсысэр. Апхуэдэу еджакIуэм щапхъэу къихьыну и пщэрылът хъыбарыжьхэм, таурыхъхэм псалъэр къызэрыщыкIуэр; ар фIэщыгъэу къагъэсэбэпамэ, художественнэ тхыгъэхэм узэрыщрихьэлIэр (прозэми поэзиеми). КъинэмыщIауэ, псалъэр щызэхихым езы къэхутакIуэр зригъэгупсысыр, и нэгу къыщIигъэхьэр лэжьыгъэм хипщэни хуейт.
КъэпщытакIуэхэм къалъытэнут зэпеуэм хэтым и лэжьыгъэр утыку къызэрырихьэ бзэм и шэрыуагъыр, утыку къищI гупсысэр зэрызэкIэлъыгъэкIуа щIыкIэр, псалъэм и тхыдэр зэпкърыха, къэIуэта зэрыхъуам и кууагъыр, къигъэсэбэп щапхъэхэр псалъэм и тхыдэр нэгъэсауэ зэпкърыхыным зэрытелажьэр, къэпсэлъэныгъэр хухэха пIалъэм (дакъикъипщIым) къызэритIасэр.
Зэпеуэм къыхыхьа ныбжьыщIэхэр хуабжьу жьакIуэт, къыхаха Iуэхугъуэхэр зэпкърахын папщIэ, лъэныкъуэ куэдкIэ къэхутэныгъэ ирагъэкIуэкIат еджакIуэхэм. Языхэзми и ехъулIэныгъэхэр нэрылъагъут, ауэ ар къызыхэкIари гурыIуэгъуэщ: егъэджакIуэхэм гъуэгу пэж ирагъэлъэгъуат, Iуэхум кIуэрабгъукIэ хашат.
ЕджакIуэхэм я лэжьыгъэхэр къэзыпщыта гупым хэтащ КъБКъУ-м адыгэбзэмрэ литературэмкIэ и кафедрэм и егъэджакIуэ, доцент УнэлIокъуэ Вячеслав, КъБКъУ-м ЕгъэджакIуэхэр щагъэхьэзыр и колледжым и егъэджакIуэ Лъостэн Марианнэ, Адыгэбзэ Хасэм и цIэкIэ – Табыщ Мурат.
КъэпщытакIуэхэм къыхагъэщащ еджакIуэ ныбжьыщIэхэм утыку кърахьа къэхутэныгъэхэр псоми къазэрехъулIар, щIэщыгъуэ куэд абыхэм зэрыхалъэгъуар, дяпэкIи узэлэжь хъун хьэлэмэт Iэджи къызэрыщIагъэщар. Ауэ, сыт хуэдизу лэжьыгъэхэм гур хамыгъахъуэми, екIуэкIыр зэпеуэти, увыпIэхэр тегуэшэн хуейт. КъыщIидзар мыращ.
КъэпщытакIуэ гупым хэтхэм Гран-прир хуагъэфэщащ Дзэлыкъуэкъуажэ дэт курыт еджапIэм №1-м и 11-нэ классым щеджэ Дол Динарэрэ 9-нэ классым щеджэ Аброкъуэ Радимэрэ. ЕгъэджакIуэр Бей Жансурэтщ.
Япэ увыпIэр иратащ Хьэтуей къуажэм дэт, Дол Хьэсэнбий и цIэр зезыхьэ курыт еджапIэм и 9-нэ классым щеджэ Къанло Аидэ. ЕгъэджакIуэр БищIо Мафурэщ.
2-нэ увыпIэр зэдагуэшащ Джэрмэншык къуажэм дэт курыт еджапIэм и 9-нэ классым щеджэ Джыназ Даринэрэ (егъэджакIуэр ГъукIэпщокъуэ Iэсиятщ) Тамбовскэ къуажэм дэт, Щомахуэ Алексей и цIэр зезыхьэ курыт еджапIэм и 7-нэ классым щеджэ ТIахъуш Алёнэрэ (егъэджакIуэр Щомахуэ Дусэщ).
Зэпеуэм хэтахэм ящыщу 3-нэ увыпIэр ялъысащ Инарыкъуей къуажэм дэт, Пэнагуэ Азэмэтджэрий и цIэр зезыхьэ курыт еджапIэм и 9-нэ классым щеджэхэу ДыщэкI Ясминэрэ Шэрий Дисанэрэ (егъэджакIуэр Хьэрэдурэ Эммэщ). Къармэхьэблэ дэт, Къамбий Мухьэб и цIэр зезыхьэ курыт еджапIэ №1-м и 9-нэ классым щеджэ Кърымщокъал Мэрьем (егъэджакIуэр Бей Маринэщ).
ФIыщIэ яхуэфащэщ мыпхуэдэ лэжьыгъэ мытынш, ауэ щхьэпэ, бзэм и щэхухэм куууэ щызыгъэгъуазэм зи еджакIуэхэр къыхэзышахэм. Щытхъу яхуэфащэщ щымышынэу абы хыхьэу екIурэ ещхьу утыку ита еджакIуэхэми.
ШУРДЫМ Динэ.