Кёп болмай КъМР-ни Саулукъ сакълау министерствосунда  брифинг болгъанды. Анда баш тема  республикада кёме жайылмазча амаллагъа жораланнганды.  Анга  штатда болмагъан  баш специалист- эпидемиолог  эм  специалист-инфекционист  Медина Петрова,  Римма Берова, Роспотребнадзорну  эпидемиология надзор жаны бла бёлюмюню таматасыны орунбасары Карина Мурзаканова, сабийлеге медицина болушлукъ тапдырыу бёлюмню эм ауурлукълары болгъанлагъа бла аналагъа медицина болушлукъ береген службаны таматасы Юлия Шогенова къатышхандыла.

Быйыл жыл башланнганлы Россейде кёмеден ауругъан 900-ге  жууукъ шарт ачыкъланнганды.  Къабарты-Малкъарны юсюнден  айтханда  сагъынылгъан кезиуде эки саусуз тинтилгендиле.   Аладан бири сабийди, аны ауругъаны  лаборотор халда билиннгенди.   Эпидемиология жаны бла тинтиуле кёргюзтгенлерича, ауругъан сабийлени кёбюсю   кёмеден дарман салынмагъанладыла.   Аны баш сылтауларындан бири уа   ата-аналаны уллу кёллюлюклериди.  

Тюбешиуде журналистле унутулгъан  ауруу  жангыдан нек жайылып башлагъанын,  аны къалай тинтирге боллугъун эм анга  профилактика бардырыну юсюнден да  соргъандыла.  

Эксперле айтханнга кёре, кёме къыйын жукъгъан аурууладан бириди эм аны багъарча энчи амал жокъду.  Ол саулукъгъа уллу заран салыргъа, бирде уа ёлюмге келтирирге болады.  Аны заранлыгъы  бютюнда   прививка этилмеген  сабийлеге   къоркъуулуду. Болсада  дарман салдырыугъа сюймегенлени  санына  къошула барса, мындан арысында  полиомиелит, дифтерия дегенча къыйын  ауруула  да къайтыргъа боллукъдула. 

Кёмени эм уллу аманлыгъы саусуз солуу неда тюкюрюгю тийсе  жюз процентге жукъдурады. Ауругъан адамны кёзлери къызарадыла эм жётел тийеди, ол себепден кёпле аны  грипп бла ажашдырадыла.

Андан эм иги профилактика ол дарман салдырыуду. Прививка этилмегенле эм биринчиден   IgG антителалагъа анализ берирге керекдиле. Буасагъатда вакцина сабийни бир жылында, экинчиси уа алты жылында   салынады.

Абаданлагъа  уа дарманны эки  къат этиледи. Биринчи  бла  экинчини арасында  юч ай озаргъа тийишлиди.