РФ-ни Экономиканы айнытыу министерствосунда бардырылгъан видеоконференцияда регионлада инвестициялы Стандартны тамамлауну юсюнден сёлешгендиле. Ушакъгъа КъМР-ни экономиканы айнытыу министри Рахайланы Борис, министерствода къырал программала эмда къырал-иели партнёрлукъ департаментни башчысы Темиркан Баждугов да къатышхан эдиле.

Кенгешде Россей Федерацияны субъектлеринде жангы инвестициялы проектлеге себеплик этиу системаны сингдиргенде чыгъыучу тыйгъычланы ачыкълауну, аланы кетериу амалланы юсюнден сёлешиннгенди.

Бу системаны кийириу быйыл Къабарты-Малкъарда да башланнганды. Ол кеси да оноу этиу, финанс, билим бериу эмда тамамлау кесекледен къуралады. Аны чеклеринде кёп иш этиле барады, ол санда республиканы инвестициялы декларациясы да тийишдириледи. Дагъыда «Къабарты-Малкъар Республиканы айнытыу Корпорациясы» АО-ну уставына, республиканы Башчысында инвестицияла эмда предпринимательство жаны бла Советни положениясына да тюрлениуле кийириледиле.

Регионну инвестициялы картасын къурауну чеклеринде былтыр РФ-ни Экономиканы айнытыу министерствосуну системасына Къабарты-Малкъарны ресурс онгларыны, инфраструктурасыны, мында бардырыллыкъ эм тамамлана тургъан инвестициялы проектлени, сора алагъа къыралны жанындан не бла себеплик этилгенини юсюнден информация жиберилген эди.

Кенгешни кезиуюнде аланы юсюнден кёп айтылгъанды, тийишли рекомендацияла да берилгендиле. Сагъынылгъан стандартны сингдириу иш андан ары бардырылады.

Улбашланы Мурат хазырлагъанды.