Россейде  "дизайн-код" деген термин кёп болмай  кийирилгенди.  Болсада бюгюнлюкде къыралны  шахарларыны   бетин  айбатландырырча аны тири хайырланып башлагъандыла.  

Шахар болумну комплекс халда айнытыуда  дизайн-код,  мастер-план  эм  регламент бла бирге юч баш механизмден бирине саналады. Ол   билдириу (реклама) плакатла, жеринден тепдирилирге жарагъан сатыу-алыу точкала, коммерциялы объектлени тыш жанлары, инфраструктура  эм башха затланы къалайда эм  къаллай болургъа кереклерин белгилейди.  

Нальчикни баш архитектору  Аслан Бидов айтханнга кёре, ишчи къауум шахарчыланы бла  бизнесменлени оюмларын эсге алыргъа,  аны бла бирге  регламентге таяныргъа керекди. 

- Шахарда  дизайн-кодну излемлерине кёре,  кёп объектни тюрлендирирге боллукъду. Болсада эм биринчи юйлени тыш жанларына  эм  керексиз билдириуле бла  реклама къангалагъа  эс буруллукъду.   Аны бла бирге орамла жарыкъ болурча, тийишли  белгиле орнатылырча   эм башха шартлагъа да  къараллыкъды. 

Бир-бир предпринимательлени  реклама  конструкцияладан уллу хапарлары жокъду. Тюкенлерин неда башха коммерциялы мекямларыны юсюн-башын да танг кесек жазыудан толтурургъа кюрешедиле.   Болсада марда актлагъа кёре,  вывеска бла реклама  конструкцияны башхалыгъы уллуду.  Сёз ючюн,   биринчисинде жерлешлерибиз  продукцияны  къурамын, багъасын,  биригиуню  сайтын, телефонун жазып кюрешедиле.  Алай бла терезелени бла декорну  орунуна  жалан реклама кёрюнеди. Аны ючюн  дизайн-кодну жарашдыргъанда предпринимательлеге иги ангылатырча   регламент да толуракъ болургъа керекди.  

Дизайн-код энчи бир  шахарны, районну излемлерине кёре жарашдырылады. Аны чеклеринде маданият, миллет энчиликлеге да эс бурулады. Аллай амал аз къоранчла бла шахарны бетин иги  жанына тюрлендирирге болушады.   Ызы бла шахарны брендин  эм энчилигин да хазырларча иш тамамланырыкъды.  

Бир жолгъа шахарны бетин тюрлендирип, айбатландырып къояргъа онг жокъду.  Эм биринчиден,  быллай оюмгъа жамауат кеси келирге керекди. Ол себепден  биринчи  жолда тийишли ишле Ленин атлы проспектде, Къабарты орамны баш жанында тамамланырыкъдыла. Дизайн-код  регламентден сора да, жамауат бла келишиулюкдю. Ол себепден  нальчикчиле эм  предпринимательле да къатышып тюбешиуле ётерикдиле,- дегенди Аслан Хасанович.

Ишчи комиссияны санына кирген, шахарны айнытыу жаны бла  "Платформа"  институтну таматасы  Оксана Шухостанова айтханыча, миллион адам жашагъан мегаполиследен  тышында,  бусагъатда дизайн-код   Курск, Рязань, Тобольск, Псков, Иваново, Белгород эм Дербент шахарлада да  хайырланыладыла.

Жангы излемле  гитче предприятияла уллу биригиуле бла жутулуп къалмазча  болушадыла.  Бир тюрлю файда тюшюрюрге сюйгенлени жамауатдан айырыргъа  жарамайды. Кишини жанына тиймезча  шахарны бетин тынч-тынч тюрлендирирге тийишлиди.  Эм биринчиден,  жамауатны жанындан специалистлеге ышаныулукъ болургъа керекди. 

- Былтыр "Арт-Зал Платформа" учреждение  Нальчикни мэриясыны себеплиги бла лекцияла бардырырча   "КОД" архитектура бюрону къурагъанланы,  "Архитекторы.РФ" программаны выпускниклерин  Ксения Деева бла Анастасия Конареваны  чакъыргъан эдиле. Анга Архитекторла, бизнесни келечилери эм башхала да къатышхандыла.  Мындан арасында да бу жаны бла байламлыкъны айнытыргъа таукелбиз,- деп къошханды Оксана Хабасовна.  

Ишчи комиссиняны биринчи тебешиую бу  айны ахырында ётерикди. Бусагъатда анда сюзюллюк материалла  жарашдырыла турадыла.

Магометланы Сулейман.