КъМР-де Жер-жерли самоуправление советини ассоциациясыны правленини кезиулю жыйылыуунда Май районда инсанланы тарыгъыуларын бла тилеклерин тинтиуню сынауу сюзюлгенди.
Кенгешге КъМР-ни Башчысыны Администрациясыны ич политика эм жер-жерли самоуправленияны соруулары жаны бла управлениясыны кенгешчиси Алексей Храмцов, Жер-жерли самоуправленияны битеуроссей советини регион бёлюмюню таматасы, Черек району башчысы Къулбайланы Алан, районланы бла шахарланы администрацияларыны таматалары, жер-жерли самоуправление советлени келечилери да къатышхандыла. Жыйылыуну АСМО-ну правленини таматасы Максим Панагов бардыргъанды.
Май районну администрациясы инсанланы тилеклерин эм тарыгъыуларын къалай тамамлагъанын, алагъа кёре оноула чыгъарыуну сынауу бла жыйылгъанланы районну жер-жерли администрациясыны ишлерин къурау жаны бла келечиси Инна Фомина шагъырей этгенди. Ол инсанланы излемлерин толтуруу жууаплы ишледен бири болгъанын, анга къыралны оноучулары энчи эс бургъанларын чертгенди. «Ол инсанланы эркинликлерин сакълауну амалларындан бириди, властьны бла халкъны арасында байламлыкъланы къураргъа онг береди. Аны бла бирге уа адамла жашагъан жерлеринде кемчиликлени кетериуге къошуладыла, власть органланы ишлерине контрольну тамамлайдыла»,– дегенди ол.
Тилеклени бла тарыгъыуланы уа инсанла электрон халда жиберирге, жууаплы къуллукъчула бла тюбешиуледе билдирирге да боллукъдула. Районну сайтында телефонла, электрон почта, социальный сетьледе бетлени адреслери да жазылыпдыла. Тарыгъыула бла тилекле асламында жашау журт-коммунал мюлкню иши, жашау журтла бла жалчытыу, эллени айбатландырыу бла байламлыдыла.
Докладны сюзе, жыйылгъанла Май районну сынаууна иги багъа бергендиле. Инсанладан келген тилеклени бла тарыгъыуланы тамамлагъан кезиуде праволу база ахшы хайырланылгъанын белгилеп, башха районлагъа да аланы сынаулары бла шагъырей болургъа, ишлеринде хайырланыргъа кереклиси белгиленнгенди. Дагъыда жеринде власть органлагъа инсанланы тилеклерин тинтиуню болумларын жарашдырыргъа, инсанланы приёмгъа алыуну тизмесин къабыл кёрюрге кереклиси да эсгертилгенди. Мунициапал къуллукъчуланы бла депутатланы жамауат бла байламлыкъланы кючлерге, аланы башламчылыкъларын тамамларгъа кереклисини юсюнден да айтылгъанды.
Кенгешде дагъыда Россейни Юг жаныны регионларыны координация советини жыйылыууну программасы да сюзюлгенди. АСМО-ну толтуруучу директору Николай Маслов билдиргенича, ол Нальчикде 15-17 мартда бардырыллыкъды. Ол билдиргенича, координация совет къуралгъанлы 15 жыл толгъанды, анга Адыгеяны, Шимал Осетия – Аланияны, Кърымны, Ингушетияны, Дагъыстанны, Къарачай-Черкесни, Калмыкияны, Чечен Республиканы, Краснодар эм Ставрополь крайланы, Астрахань, Волгоград, Ростов областьланы эм Жигит шахар Севастопольну муниципал къуралыуларыны советлери киредиле.
Жыйылыуда башха соруулагъа да къаралгъанды.
Тикаланы Фатима.
