Регионнга оноу этиу жаны бла ара Элбрус районну жер-жерли администрациясыны башчысыны къуллугъун толтургъан Сотталаны Къурманны тюзюнлей эфирде ушакъгъа чакъыргъанды. Ол ишини юсюнден хапар айтханды,къараучуланы сорууларына да жууапла бергенди.
Ушакъны кезиуюнде Къурман Сеитович билдиргенича, «Эльбрус» курорт терк атламла бла айныйды. Къыш кезиуге Азау талада 800 машина сыйынырча жер къуралгъанды. 2022-2025 жыллагъа федерал бюджетден курортну айнытыугъа бёлюннген ахчаны ёлчеми 16 миллиард сом чакълы бирди. 2030 жылгъа уа Азауда тау лыжа ызланы 47 километри, 14 канат жол хазырланыллыкъды эмда къонакълагъа 4200 чакълы бир жер къураллыкъды.
Жолланы юслеринден айта, район башчы Элбрус элде Мусукаев орамда эмда Адыл-Сууда жолну 3,5 милометри чакълы бирине ремонт этерге белгиленнгенин, Тырныауузда баш орамлада бла Молодёжный тыгъырыкъда жангыртыу ишле бара тургъанларын билдиргенди. Ол айтханыча, былтыр сууну тазалаучу эмда кир сууланы ётдюрюучю ызла тартылып башланнгандыла. Ол ишлеге федерал бюджетден 980 миллион сом жиберилгенди. Битеу ишле быйылны ахырына тамамланыллыкъдыла.
2023 жылда бардырыллыкъ ишлени юслеринден айта, Сотта улу Тырныауузда, Быллымда, Нейтринода бла Элбрусда тёрт школгъа тынгылы ремонт этерге белгиленнгенин билдиргенди. Терс-Къолда 150 окъуучугъа биринчи школ ишленирикди. Тырныауузда район Маданият юйге, Элбрус элде спорт комплексге бла Маданият юйге, Тегенеклиде суу ызгъа тынгылы ремонт этер план барды.
Район башчы къараучуланы Тырныауузда Мир орамда жолгъа къачан ремонт этиллигини, Бедик элни тап халгъа келтирир мурат болгъаныны бла къалгъаныны юсюнден сорууларына жууапла бергенди. Анга дагъыда Тырныауузну Камук тийресинде школ болмагъанын, Нейтринода суу бла жалчытыу осал болгъанын да эсгертгендиле.
