«Иш кёллю Россей» жамауат организацияны Къабарты-Малкъарда бёлюмюню келечиси Надежда Пляко Прохладна шахарда кёп профильли колледжни башчысы Александр Голубничий бла тюбешгенди. Ала предприятиялагъа ишчиле хазырлауну эмда бу окъуу учрежденияны «Иш кёллю Россейни» жаш тёлю социал проектлерине къатышыуну юсюнден сёлешгендиле.

Бу колледжде быйыл 650 чакълы студент окъуйду. Алагъа ма быллай усталыкъладан билим бериледи: «Жамауатха аш-азыкъ этиуде продукцияны технологиясы», «Кийимле къурау, жарашдырыу эмда аланы технологиялары», «Школгъа дери билим бериу», «Электрокюч оборудованиягъа къарагъан эмда анга ремонт этген электромонтёр», «Быстыр тигиу», «Аш этиучю, кондитер», «Темирле бишириу», «Тракторист-машинист эл мюлк производствода», «Къыйын болумлада къорууланыу».

Былтыр «Жаш устала» WorldSkills Russia деген регион эришиулеге да къатышхан эдиле колледжни келечилери. Ала талай номинациялада саугъалагъа тийишли болгъандыла. Алгъан майдалланы саны бла уа учреждение тёртюнчю жерге чыкъгъанды.

Надежда Пляко колледжни окъуучуларын «Стильный акцент» конкурсха эмда «Иш кёллю Россейни» Жаш тёлю бизнес-школуна къатышыргъа чакъыргъанды. Дагъыда предпринимательле бла тюбешиуле къураргъа онг болгъанын, ол алагъа иш табаргъа себеплик этерге боллугъун да чертгенди. Колледжни башчысы Александр Голубничий а алай байламлыкъла жюрютюрге хазыр болгъанын билдиргенди.

Улбашланы Мурат хазырлагъанды.