Бизни республикада жашау журт-коммунал мюлк предприятияланы электрокюч ючюн борчлары 1,1 миллиард сомдан атлагъанды. Ол быйыл биринчи январьгъа тергеуледиле, кеслери да 2021 жылда августну аллындан бери жыйылгъандыла, дегендиле «Каббалкэнергода».

Бу организацияда айтханларына кёре, андан 94 процентин суу эмда жылыу бла жалчытхан организацияла берирге керекдиле. Былтыр кюйдюрген электрокючню багъасын а ала экилери жаланда 16,8 процентин тёлегендиле.

Борчлары болгъан предприятияланы иги кесеги банкрот халдадыла. Аны хатасындан аладан ахча жыйгъан да къыйынды.

Коммунал бёлюмде этилген борчла электрокюч бла жалчытхан предприятияны ишине да хата саладыла. Аны себепли экинчилери былтыр 1203 иск бергендиле сюдлеге. Сёз анда 847,3 миллион сомну юсюнден барады. Бу ишни хайырындан а жаланда 35,5 миллион сом жыйылгъанды. Ол а быллай предприятиялада борчларын тёлеу жаны бла низам доюн болмагъанын энтта да кёргюзтеди, деп белгилегендиле «Каббалкэнергода».

Омарланы Мурат хазырлагъанды.