Россейде быйыл биринчи сентябрьде ветеринария документлени (ВСД) жарашдырыу жаны бла жангы жорукъла ишлеп башларыкъдыла. Аланы РФ-ни Эл мюлк министерствосу тохташдыргъанды, деп билдиргендиле Къабарты-Малкъарны Ветеринария управлениясындан.

Жангы жорукъланы хайырланыу болжалы алты жылды. Праволу информация жаны бла интернет-порталда министерствону тийишли буйругъу басмаланнганды.

Шёндюгю жорукъла уа 2016 жылдан бери хайырланыладыла. Малчылыкъ продукциягъа электрон ветеринар сертификатла Россельхознадзорну «Меркурий» системасында жарашдырыладыла. Ол а «ВетИС» деген къырал системаны бир кесегиди. Эсге сала айтсакъ, быллай сертификатны эт, чабакъ, битеу тюрлю сют продукциялагъа, сора дагъыда балгъа алыргъа керекди.

Бир сутканы ичине «Меркурийде» онтёрт миллиондан артыкъ сертификат бериледи. Системаны ай сайын 700 мингден артыкъ мюлк хайырланады. Хар бирини ишине уа Россельхознадзор кёз-къулакъ болады. Аны инспекторлары эски неда бузулгъан продукциягъа ветеринар документле жарашдырылгъанын бек женгил кёредиле, аланы кёз туураларындан башха кемчиликле да кетмейдиле.

Улбашланы Мурат хазырлагъанды.