УФ-м и Президентым и унафэкIэ 2023 гъэр ЕгъэджакIуэмрэ унэтIакIуэмрэ я илъэсу ягъэнэхуащ. А жэрдэмым ипкъ иткIэ зэрыкъэралу егъэджэныгъэ лэжьыгъэшхуэ щекIуэкIынущ, а IэнатIэм пэрытхэм методикэ и лъэныкъуэкIэ я лэжьыгъэм халъхьэ щIэщыгъуэхэр, щIэблэм щIэныгъэ ябгъэдэлъхьэнымкIэ къагъэсэбэп гъэщIэгъуэнхэр утыку къихьэным хуэунэтIауэ. Къэбэрдей-Балъкъэрри а Iуэхугъуэм еджэныгъэм пыщIа пэхуэщIэ (проект) щэ ныкъуэ хуэдизкIэ пежьэну и гугъэщ.
Къэрал унафэщIым жэрдэм ищIа Iуэхугъуэм егъэджакIуэхэр къызэщIэIэтэн, IэнатIэм и пщIэр къэIэтын, щIэныгъэм и купщIэмрэ и мыхьэнэмрэ гъащIэм къешэлIэн мурадхэр иIэщ. Урысейми абы и щIыналъэхэми къыщызэрагъэпэщыну зэхьэзэхуэхэм, зэпеуэхэм щытекIуэхэмрэ къыщыхэжаныкIхэмрэ дяпэкIэ нэхъ зэраIэтынум, алъандэрэ зэрекIуэкIам нэхърэ нэхъыбэжкIэ зэрыгъэгушхуэным хущIэкъунущ.
Къэбэрдей-Балъкъэрым и Правительствэм зэрытриухуэмкIэ, 2023 гъэм егъэджакIуэхэм зыщIагъэкъуэн, зыпэрыт IэнатIэм щаIэ ехъулIэныгъэхэм я пщIэр къиIэтын папщIэ къэрал бюджетым къыхэкIыу мылъку хуиутIыпщынущ. ДяпэкIэ «Илъэсым и егъэджакIуэ», «Илъэсым и гъэсакIуэ», «Илъэсым и IэщIагъэлI» зэхьэзэхуэхэм я щIыналъэ Iыхьэхэм щытекIуахэм сом мин щэрыщэ иратынущ, абыхэм къыщыхэжаныкIахэмрэ унэтIыныгъэ щхьэхуэхэмкIэ лауреат хъуахэмрэ сом мин щэ ныкъуэ-щэ ныкъуэ хуагъэфэщэнущ. Абы къищынэмыщIауэ, «Къуажэ егъэджакIуэ» къэрал программэр зыгъэзащIэ егъэджакIуэхэми зэрадэIэпыкъун, зыпэрыт IэнатIэр къызэрыщагъэпсынщIэн Iэмалхэр нэхъыбэ ящIынущ. Апхуэдэу къэрал къулыкъущIэхэм я мурадщ егъэджакIуэхэмрэ гъэсакIуэхэмрэ я лэжьапщIэм зэрыхагъахъуэм хуэдэу ирагъэкIуэкIыну.
Къэбэрдей-Балъкъэрым Егъэджэныгъэмрэ щIэныгъэмкIэ и министерствэм хъыбар къызэритамкIэ, егъэджакIуэ цIэрыIуэ, тхакIуэ, Урысейр лъэпкъ щэнгъасэр щIэныгъэм хуэзыша Ушинский Константин къызэралъхурэ илъэс 200 щрикъум ирихьэлIэу егъэджакIуэхэм я пщIэмрэ щIыхьымрэ къызыхэщ скъар ухуэныгъэ ин щIыналъэм щагъэувынущ. «ЕгъэджакIуэхэм я хьэкъым цIыхубэм пщIэ зэрыхуащIыр, щыIэныгъэмрэ щIэблэм я къэкIуэнумрэ абыхэм куэдкIэ зэрелъытар къызыхэщ а скъар ухуэныгъэм абыхэм яхудиIэ пщIэр къридгъэлъэгъуэну аращ, армыхъумэ нэхъыбэж зэрахуэфащэри, зыпэрыт IэнатIэр куэд зэрыхуэныкъуэри фIы дыдэу зыхыдощIэ», – щыжаIащ къулыкъущIапIэм.

ШУРДЫМ Динэ.